پی ٹی آئی کا آج پشاور میں بڑا پاور شو، سہیل آفریدی کے مطابق انتظامات مکمل، کارکنان کی بڑی تعداد متوقع
تفصیلات کے مطابق پاکستان تحریک انصاف (پی ٹی آئی) آج پشاور میں ایک بڑا پاور شو منعقد کرے گی، جس کے لیے تمام انتظامات مکمل کر لیے گئے ہیں۔ ملک بھر سے پارٹی کارکنان کی بڑی تعداد کے جلسے میں شریک ہونے کی توقع ہے۔
وزیر اعلیٰ خیبر پختونخوا سہیل آفریدی نے پشاور جلسے کے حوالے سے ایک ویڈیو پیغام جاری کیا، جس میں کہا کہ جلسہ آج (اتوار) کو حیات آباد اسپورٹس کمپلیکس میں منعقد ہوگا۔ انہوں نے کہا کہ اس موقع پر تحریک تحفظ آئین پاکستان کی قیادت بھی موجود ہوگی۔
سہیل آفریدی نے مزید کہا کہ جلسے میں پی ٹی آئی، آئی ایس ایف، یوتھ ونگ سمیت پارٹی کی تمام تنظیمیں حصہ لیں گی۔ انہوں نے عوام سے اپیل کی کہ وہ جلسے میں شرکت کے لیے آئیں اور ویڈیو پیغامات کے ذریعے دوسروں کو بھی دعوت دیں۔ وزیر اعلیٰ نے زور دیا کہ جلسے کی کامیابی کے لیے ہر فرد اپنا کلیدی کردار ادا کرے۔
پارٹی ذرائع کے مطابق جلسے کا مقصد عوامی رابطے کو مزید مضبوط کرنا اور پارٹی کی یکجہتی کو اجاگر کرنا ہے۔ انتظامیہ نے مقامی سطح پر سیکورٹی کے تمام انتظامات مکمل کر لیے ہیں تاکہ جلسہ بلا رکاوٹ اور پرامن انداز میں منعقد ہو سکے۔
