پاک فوج کے فرنٹیئر کور خیبر پختونخوا نارتھ نے وادیِ تیراہ کے علاقے مہربان کلی میں فری میڈیکل کیمپ کا انعقاد کیا، جس میں مجموعی طور پر 700 سے زائد مریضوں کو طبی امداد فراہم کی گئی۔
تفصیلات کے مطابق اس فلاحی کیمپ میں ماہر ڈاکٹرز نے مریضوں کا معائنہ کیا اور ضرورت کے مطابق مفت ادویات بھی فراہم کی گئیں۔ کیمپ کے دوران مریضوں کی صحت کی جانچ کے ساتھ ساتھ انہیں بیماریوں سے بچاؤ کے بارے میں بھی معلومات فراہم کی گئیں۔
مقامی شہریوں نے اس اقدام پر پاک فوج کا تہہ دل سے شکریہ ادا کیا اور اسے قابلِ تحسین عمل قرار دیا۔ مقامی افراد نے کہا کہ ایسے اقدامات سے نہ صرف صحت کے مسائل میں کمی آتی ہے بلکہ عوام میں اعتماد اور تعاون کا جذبہ بھی پیدا ہوتا ہے۔
پاک فوج کی جانب سے یہ فری میڈیکل کیمپ وادیِ تیراہ کے عوام کی فلاح اور سہولت کے لیے کیا گیا، جس سے یہ ظاہر ہوتا ہے کہ افواجِ پاکستان نہ صرف ملک کے دفاع بلکہ عوام کی خدمت میں بھی پیش پیش ہیں۔
اس موقع پر مقامی حکام اور کمیونٹی کے نمائندے بھی موجود تھے، جنہوں نے فرنٹیئر کور کے اس اقدام کو سراہا اور کہا کہ ایسے اقدامات علاقے میں عوام کی صحت اور خوشحالی کے لیے اہم ہیں۔
