سوات میں موسم سرما کی پہلی برفباری نے پہاڑوں کو سفید چادر میں لپیٹ دیا اور سیاحوں کی دلچسپی کو مزید بڑھا دیا۔ موسم کی یہ خوبصورت تبدیلی سیاحوں کو چیئر لفٹ، سنو فال اور قدرتی مناظر کا لطف اٹھانے کے لیے مالم جبہ کی طرف لے گئی۔
طویل خشک سالی کے بعد خیبر پختونخوا کے بالائی اضلاع میں ہونے والی برف باری نے قدرتی مناظر کو اور بھی حسین بنا دیا۔ موسم سرما کی پہلی برف باری کے بعد مالم جبہ میں سیاحوں کی بڑی تعداد نے رش لگایا اور ہر طرف خوشی و جوش کا ماحول دیکھنے کو ملا۔
برف سے ڈھکے پہاڑ، یخ بستہ ہوا اور قدرتی حسن دیکھنے کے لیے آنے والے بچوں، خواتین اور مردوں نے چیئر لفٹ کا بھرپور لطف اٹھایا۔ سیاحوں کا کہنا تھا کہ پاکستان کے شمالی علاقے واقعی قدرت کا حسین تحفہ ہیں اور یہاں آ کر وہ بے حد خوش ہوئے۔
ماہرین کے مطابق سوات میں یہ برفباری موسم سرما کی شروعات کا عندیہ ہے اور آنے والے ہفتوں میں مزید برفباری کا امکان ہے۔ مقامی انتظامیہ نے بھی سیاحوں کو خبردار کیا ہے کہ پہاڑی علاقوں میں محتاط رہیں اور سیفٹی کے اصولوں پر عمل کریں تاکہ کوئی حادثہ پیش نہ آئے۔
مالم جبہ کے یہ مناظر نہ صرف سوات بلکہ پورے شمالی پاکستان کے لیے ایک پرکشش سیاحتی مقام بن گئے ہیں، جہاں قدرت کی خوبصورتی اور سردیوں کے مزے کو ایک ساتھ محسوس کیا جا سکتا ہے۔
