اسلام آباد: پاکستان نے وینزویلا میں حالیہ تشویشناک حالات پر گہری تشویش کا اظہار کیا ہے اور تمام فریقین پر تحمل اور کشیدگی میں کمی کی اپیل کی ہے۔
یہ موقف دفتر خارجہ کے ترجمان طاہر حسین اندرابی نے جاری کردہ بیان میں سامنے آیا۔
ترجمان کے مطابق پاکستان وینزویلا کے عوام کی فلاح و بہبود کو انتہائی اہمیت دیتا ہے اور بدلتی صورتحال پر باقاعدہ نظر رکھے ہوئے ہے۔
انہوں نے زور دیا کہ بحران کے حل کے لیے اقوام متحدہ کے چارٹر اور بین الاقوامی قانون کی مکمل پاسداری ناگزیر ہے۔
طاہر حسین اندرابی نے مزید کہا کہ پاکستان وینزویلا میں مقیم اپنے شہریوں کی سلامتی اور تحفظ کے لیے ضروری اقدامات کر رہا ہے تاکہ کسی بھی خطرناک صورتحال سے بچاؤ ممکن بنایا جا سکے۔
واضح رہے کہ حالیہ واقعات میں امریکی فوج نے وینزویلا کے دارالحکومت سمیت مختلف مقامات پر حملے کیےاور صدر نکولس مادورو اور ان کی اہلیہ کو گرفتار کرکے امریکا منتقل کر دیا۔
یہ بھی پڑھیں : لکی مروت: سی ٹی ڈی اور لکی پولیس کی کامیاب کارروائی، مطلوب دہشتگرد کمانڈر ہلاک
اس پیش رفت کے بعد دنیا بھر میں وینزویلا کی صورتحال پر تشویش پائی جا رہی ہے اور بین الاقوامی برادری بحران کے پرامن حل کے لیے زور دے رہی ہے۔
پاکستان کے دفتر خارجہ کا بیان واضح کرتا ہے کہ ملک بین الاقوامی قوانین اور انسانی فلاح و بہبود کے اصولوں پر عمل پیرا رہتے ہوئے صورتحال پر نظر رکھے ہوئے ہے اور تمام ممکنہ اقدامات کے لیے تیار ہے۔
