اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے پاکستانی شہریوں کے لیے ایک اہم ڈیجیٹل سہولت شروع کر دی ہے، جس کے تحت اب شہری پاک آئی ڈی موبائل ایپ کے ذریعے گھر بیٹھے اپنے شناختی ریکارڈ کو اپ ڈیٹ کر سکیں گے۔
یہ اقدام شہریوں کو دفاتر کے چکر، طویل انتظار اور سفر کی مشکلات سے بچانے کے لیے کیا گیا ہے۔
نادرا کے مطابق نئی سہولت کے ذریعے شہری اپنے شناختی کارڈ سے متعلق نان پرنٹیبل معلومات آن لائن درست کر سکیں گے۔
پاک آئی ڈی ایپ میں مرحلہ وار ہدایات موجود ہیں تاکہ صارفین آسانی سے معلومات درست اور قواعد کے مطابق فراہم کر سکیں۔
نادرا حکام کا کہنا ہے کہ یہ سروس تیز، آسان اور صارف دوست ہے اور اس کے لیے معمولی فیس مقرر کی گئی ہے۔
اس سہولت کے ذریعے شہری بغیر کسی اضافی وقت ضائع کیے، دفتر میں قطاروں میں لگے بغیر اپنی ذاتی معلومات اپ ڈیٹ کر سکتے ہیں، جس سے وقت اور وسائل دونوں کی بچت ممکن ہو گی۔
حکام نے مزید کہا کہ ڈیجیٹل سروسز کے فروغ سے نہ صرف عوام کو سہولت ملے گی بلکہ سرکاری ریکارڈ میں درستگی اور شفافیت بھی بڑھے گی۔
پاک آئی ڈی ایپ کے ذریعے ریکارڈ اپ ڈیٹ ہونے سے ڈیٹا میں غلطیوں کے امکانات کم ہوں گے اور شہریوں کا اعتماد مزید مضبوط ہوگا۔
یہ بھی پڑھیں : شدید دھند کے باعث ملک بھر کی اہم شاہراہیں اور موٹرویز بند
نادرا کا کہنا ہے کہ یہ اقدام ادارے کی ڈیجیٹائزیشن پالیسی کا تسلسل ہے، جس کا مقصد شناختی نظام کو جدید تقاضوں سے ہم آہنگ کرنا اور زیادہ سے زیادہ شہریوں کو آن لائن سہولیات فراہم کرنا ہے۔
اس سہولت سے عوامی اطمینان میں اضافہ ہوگا اور شناختی دستاویزات کے انتظام میں نیا اور مؤثر ماڈل متعارف ہوگا۔
شہریوں کو ہدایت دی گئی ہے کہ وہ پاک آئی ڈی موبائل ایپ ڈاؤن لوڈ کر کے اس سہولت سے فائدہ اٹھائیں اور اپنی شناختی معلومات کو بروقت اور درست رکھیں۔
