شیراز احمد شیرازی
اسلام آباد: جمعیت علمائے اسلام کے سابق رکن قومی اسمبلی قاری محمد یوسف طویل علالت کے بعد انتقال کر گئے۔
وہ اسلام آباد کے پولی کلینک ہسپتال میں زیر علاج تھے جہاں انہوں نے زندگی کی آخری سانسیں لیں۔
قاری محمد یوسف کا نماز جنازہ ان کے آبائی گاوں بٹگرام میں ادا کیا جائے گا، جس میں سیاسی اور مذہبی شخصیات کی شرکت متوقع ہے۔
قاری محمد یوسف دو بار جمعیت علمائے اسلام کے ٹکٹ پر رکن قومی اسمبلی منتخب ہو چکے ہیں اور پارٹی کے سینئر رہنماؤں میں شمار ہوتے تھے۔ ان کی وفات سے جمعیت علمائے اسلام کے حلقوں میں گہرے دکھ کا اظہار کیا جا رہا ہے۔
جمعیت علمائے اسلام کے امیر مولانا فضل الرحمن نے قاری محمد یوسف کے انتقال پر گہرے دکھ اور افسوس کا اظہار کیا اور ان کی سیاسی و مذہبی خدمات کو سراہا۔
مولانا فضل الرحمن نے کہا کہ قاری محمد یوسف نے ہمیشہ عوام کی خدمت اور مذہبی اصولوں کی بالادستی کے لیے کام کیا، اور ان کا خلا پارٹی کے لیے محسوس کیا جائے گا۔
یہ بھی پڑھیں : شیر افضل مروت حکومتِ خیبر پختونخوا کے خلاف دھماکہ کرنے کو تیار، جلد بڑے انکشافات کا دعویٰ
پارٹی کے دیگر رہنماؤں نے بھی قاری محمد یوسف کی وفات پر غم و افسوس کا اظہار کرتے ہوئے کہا کہ ان کی خدمات ہمیشہ یاد رکھی جائیں گی، اور ان کی شخصیت پارٹی کے لیے ایک مشعل راہ تھی۔
عوامی حلقوں میں بھی ان کی وفات پر تعزیتی پیغامات جاری کیے جا رہے ہیں۔
قاری محمد یوسف کی وفات سے نہ صرف جمعیت علمائے اسلام بلکہ سیاسی اور مذہبی حلقوں میں بھی ایک نمایاں شخصیت کھو دی گئی ہے، جس کے اثرات آئندہ سیاسی سرگرمیوں میں بھی محسوس کیے جائیں گے۔
