اسلام آباد: ایران اور امریکہ کے درمیان ممکنہ تصادم کے خدشات نے عالمی مارکیٹ میں خام تیل کی قیمتوں کو 5 ماہ کی بلند ترین سطح تک پہنچا دیا ہے، جس کے اثرات پاکستان میں بھی محسوس کیے جا سکتے ہیں۔
خبر ایجنسی کے مطابق ایران پر امریکی حملے کے خدشات کے باعث برطانوی برینٹ خام تیل کی قیمت میں 2.50 ڈالر فی بیرل کا اضافہ ہوا اور یہ 70.90 ڈالر فی بیرل تک پہنچ گئی۔ عالمی مارکیٹ میں خام تیل کی قیمت میں یہ اضافہ تقریباً 4 فیصد کے برابر ہے۔
ماہرین کا کہنا ہے کہ عالمی سطح پر خام تیل کی قیمت میں اضافے کا اثر پاکستان میں پٹرولیم مصنوعات پر بھی پڑے گا۔ ذرائع کے مطابق یکم فروری سے ملک میں پٹرولیم مصنوعات کی قیمتوں میں بڑی تبدیلی متوقع ہے:
ہائی سپیڈ ڈیزل کی قیمت میں 9 روپے 47 پیسے فی لیٹر اضافہ
لائٹ ڈیزل آئل میں 6 روپے 95 پیسے فی لیٹر اضافہ
مٹی کے تیل کی قیمت میں 3 روپے 69 پیسے فی لیٹر اضافہ
پٹرول کی قیمت میں معمولی کمی، تقریباً 36 پیسے فی لیٹر
یہ بھی پڑھیں : ایم بی بی ایس اور بی ڈی ایس فیسوں کے بارے میں اہم فیصلہ
انڈسٹری ذرائع کا کہنا ہے کہ اوگرا 30 جنوری کو ورکنگ پٹرولیم ڈویژن کو نئی قیمتیں بھجوائے گا، جس کے بعد وزارت خزانہ وزیراعظم کی مشاورت سے حتمی فیصلہ کرے گی۔
تجزیہ کاروں کے مطابق، ایران اور امریکہ کے درمیان کشیدگی کے سبب عالمی تیل مارکیٹ میں غیر یقینی صورتحال بڑھ گئی ہے، اور پاکستان میں پٹرولیم مصنوعات کی قیمتوں میں اضافے کا امکان عوامی بجٹ پر دباؤ ڈال سکتا ہے۔
