ضلع لوئر دیر کے علاقے تالاش بانڈگئی میں ایک المناک ٹریفک حادثہ پیش آیا، جہاں بریک فیل ہونے کے باعث مال بردار ٹرک بے قابو ہو کر گہری کھائی میں جا گرا، جس کے نتیجے میں دو افراد موقع پر ہی جان کی بازی ہار گئے۔
ریسکیو ترجمان کے مطابق حادثہ اس وقت پیش آیا جب مال بردار ٹرک پنجاب سے دیر کی جانب جا رہا تھا۔ تالاش بانڈگئی کے مقام پر ٹرک کے بریک اچانک فیل ہو گئے، جس کے باعث ڈرائیور گاڑی پر قابو نہ رکھ سکا اور ٹرک سڑک سے پھسل کر کھائی میں جا گرا۔
ریسکیو حکام نے بتایا کہ حادثے میں جاں بحق ہونے والے دونوں افراد کا تعلق پنجاب کے ضلع قصور سے تھا۔ واقعے کی اطلاع ملتے ہی ریسکیو اہلکار فوری طور پر موقع پر پہنچے اور امدادی کارروائیاں شروع کیں۔ اہلکاروں نے نعشوں کو کھائی سے نکال کر تحویل میں لے لیا اور ضروری قانونی کارروائی کے بعد قریبی اسپتال منتقل کر دیا۔
ریسکیو حکام کے مطابق حادثے کی مزید وجوہات جاننے کے لیے تحقیقات کا آغاز کر دیا گیا ہے، جبکہ مقامی انتظامیہ کی جانب سے بھی واقعے کا جائزہ لیا جا رہا ہے۔ حادثے کے بعد علاقے میں کچھ دیر کے لیے ٹریفک کی روانی متاثر رہی، تاہم بعد ازاں صورتحال معمول پر آ گئی۔
