سکیورٹی ذرائع کے مطابق، آپریشن غضب للحق کے تحت پاک فوج نے افغان طالبان کی بلا اشتعال جارحیت کے جواب میں زمینی اور فضائی کارروائیاں جاری رکھیں۔ پاک فضائیہ نے افغانستان کے صوبے ننگرہار کے مہمند دھارا بیس میں دو اہم اہداف کو کامیابی سے نشانہ بنایا۔
ذرائع کے مطابق، اس کارروائی کے نتیجے میں افغان طالبان رجیم کو بھاری جانی و مالی نقصان اٹھانا پڑا ہے۔ پاک فوج کی فضائی اور زمینی کارروائیوں نے طالبان کی عسکری تنصیبات کو مؤثر انداز میں تباہ کر دیا، جس سے دشمن کی دوبارہ حملہ کرنے کی صلاحیت شدید متاثر ہوئی ہے۔
سیکیورٹی ذرائع کا کہنا ہے کہ آپریشن غضب للحق میں پاک فوج کی کارروائیاں انتہائی پیشہ ورانہ اور منظم انداز میں جاری ہیں، اور ملکی سرحدوں کی حفاظت اور شہری سلامتی کو یقینی بنانے کے لیے ہر اقدام بروقت اور مؤثر طریقے سے اٹھایا جا رہا ہے۔
ماہرین کے مطابق، یہ کارروائی افغان طالبان کی جارحیت کو کمزور کرنے اور پاکستان کی دفاعی صلاحیت کو ظاہر کرنے کے لیے ایک مؤثر اور فیصلہ کن اقدام ہے۔ پاک فوج کی یہ حکمت عملی دشمن کے لیے واضح پیغام ہے کہ پاکستان اپنی سرحدوں اور قومی مفادات کی حفاظت کے لیے ہر وقت تیار ہے۔
