– اسلام آباد: اسٹیٹ بینک آف پاکستان آج اپنی نئی مانیٹری پالیسی کا اعلان کرے گا، جس میں پالیسی ریٹ کو موجودہ سطح پر برقرار رکھنے کا امکان ظاہر کیا جا رہا ہے۔
ماہرین کا کہنا ہے کہ اسٹیٹ بینک ممکنہ طور پر پالیسی ریٹ کو 10.5 فیصد پر برقرار رکھے گا، تاکہ معاشی استحکام کو یقینی بنایا جا سکے۔
اسٹیٹ بینک کے گورنر جمیل احمد کی زیر صدارت مانیٹری پالیسی کمیٹی کا اجلاس آج ہوگا، جس میں ملک کی موجودہ معاشی صورتحال، مہنگائی کے رجحانات اور عالمی معاشی حالات کا جائزہ لیا جائے گا۔ اس اجلاس میں عالمی منڈی کے اثرات، تیل کی قیمتوں میں ممکنہ کمی اور مشرق وسطیٰ میں کشیدگی کو بھی مدنظر رکھا جائے گا۔
معاشی ماہرین کا خیال ہے کہ اسٹیٹ بینک موجودہ حالات کے پیش نظر پالیسی ریٹ کو 10.5 فیصد پر برقرار رکھنے کا فیصلہ کر سکتا ہے۔
تجزیہ کاروں کا کہنا ہے کہ مشرق وسطیٰ میں کشیدگی اور عالمی منڈی میں تیل کی قیمتوں میں کمی کے امکانات کم ہونے کے باعث شرح سود میں کمی کی توقعات بھی محدود ہیں۔
ماہرین کے مطابق مہنگائی کے خدشات اور اقتصادی عدم استحکام کے پیش نظر اسٹیٹ بینک محتاط حکمت عملی اختیار کرنے کے بارے میں سوچ سکتا ہے، تاکہ معیشت میں استحکام برقرار رکھا جا سکے۔
یہ بھی پڑھیں : ایران: مجتبیٰ خامنہ ای سپریم لیڈر بن گئے، سرکاری میڈیا کی تصدیق
اسٹیٹ بینک کی نئی مانیٹری پالیسی کے اعلان کے بعد سرمایہ کاروں اور کاروباری حلقوں کی نظریں اس فیصلے پر مرکوز ہوں گی، کیونکہ اس کے اثرات اسٹاک مارکیٹ، کاروباری سرگرمیوں اور قرضوں کی لاگت پر پڑتے ہیں۔
پالیسی میں کسی بھی تبدیلی کے اثرات فوری طور پر محسوس ہوں گے، خاص طور پر قرضوں کی قیمتوں اور کاروباری سرمایہ کاری پر۔
یاد رہے کہ اسٹیٹ بینک نے 2026 کی پہلی مانیٹری پالیسی 26 جنوری کو جاری کی تھی، جس میں پالیسی ریٹ کو 10.5 فیصد پر برقرار رکھا گیا تھا۔
