وفاقی وزیر برائے پیٹرولیم علی پرویز ملک نے نجی ٹی وی پروگرام میں پیٹرولیم مصنوعات کی قیمتوں میں اضافے اور کمپنیوں کے 82 ارب روپے کے ممکنہ منافع سے متعلق ماہرمعاشی امورڈاکٹر فرخ سلیم کےسوالات پر وضاحت پیش کرتے ہوئے کہا ہے کہ معاملہ اس طرح نہیں ہوتا کہ ایک بیچ نکال لیا جائے اور پھر اگلےبیچ کی قیمت کے مطابق حساب کیا جائے۔
انہوں نے کہاکہ پیٹرولیم مصنوعات کی قیمتیں مسلسل بدلتی رہتی ہیں اور کمپنیوں کو اپنی سپلائی برقرار رکھنے کے لیے نئے مال کی خریداری کا بھی انتظام کرنا ہوتا ہے۔ کمپنیوں کے لائسنس کی شرط ہوتی ہے کہ وہ کم از کم 20سے 25دن کا اسٹاک اپنے پاس رکھیں، چاہے اس کی قیمت 10روپے ہو یا 100روپے، اس کے بعد ہفتہ وار قیمتوں میں جو فرق آتا ہے، اسے کاروباری عمل کا حصہ سمجھ کر برداشت کرنا پڑتا ہے۔
وفاقی وزیر نے کہاکہ اگر آج کی قیمت کے مطابق کمپنیوں نے 25 دن بعد نیا مال خریدنا ہے تو انہیں قیمتوں کے حوالے سے ایک حد تک پیش بینی اور استحکام دینا ضروری ہوتا۔
فرخ سلیم نے سوال کیا کہ 9 مارچ کو بین الاقوامی تیل کی قیمتوں میں اچانک اضافہ اور پھر تیز کمی واقع ہوئی ،تو کیا پاکستان میں بھی تیل کی قیمتیں کم ہوں گی جس پر علی پرویز ملک نے وضاحت دی کہ عالمی سطح پر ٹینکروں کی کمی ہے، علاقائی حالات کی وجہ سے کئی کمپنیاں ٹینکروں کا انشورنس کرنے سے گریز کر رہی ہیں اور اضافی پریمیم بھی عائد کیا جا رہا ہے، جو حکومت کے لیے مجموعی لاگت میں اضافہ کا سبب بنتا ہے۔
انہوں نے کہاکہ عملی حقائق کو نظر انداز کرتے ہوئے ڈرائنگ روم میں بیٹھ کر لاگت کا حساب نہیں لگانا چاہیے؛ سعودی عرب پاکستان کی مدد کر رہا ہے اور بڑے ٹینکر کی بندوبست کر رہا ہے، جسے عمان میں لنگر انداز کیا جائے گا اور وہاں سے چھوٹے کیریئر جہازوں کے ذریعے پاکستان منتقل کیا جائے گا۔
وفاقی وزیر نے کہاکہ سعودی عرب نے پاکستان کو بڑے پیمانے پر تعاون فراہم کیا ہے اور حتیٰ کہ Very Large Crude Carrier (VLCC) فراہم کرنے کی پیشکش بھی کی ہے، تاہم یہ بڑے جہاز پاکستانی بندرگاہوں پر براہِ راست نہیں لنگر انداز ہو سکتے؛ جب روس سے VLCC پہنچتا ہے تو اسے عمان میں لنگر انداز کیا جاتا ہے، پھر پاکستان نیشنل شپنگ کارپوریشن کے جہاز عمان پہنچ کر تیل کو چھوٹے جہازوں میں منتقل کرتے ہیں تاکہ پاکستان لے جایا جا سکے۔ عوام کو گمراہ نہ کریں کیونکہ ملک مشکل وقت سے گزر رہا ہے اور سب امید کرتے ہیں کہ پاکستان ان چیلنجز پر قابو پا لے گا۔
