امریکا نے پشاور میں قائم اپنے قونصل خانے کو مستقل طور پر بند کرنے کا فیصلہ کر لیا ہے۔ اس حوالے سے امریکی محکمہ خارجہ نے رواں ہفتے امریکی کانگریس کو باضابطہ طور پر آگاہ بھی کر دیا ہے۔
امریکی ذرائع ابلاغ کے مطابق پشاور میں قائم یہ قونصل خانہ افغانستان کی سرحد کے قریب ہونے کی وجہ سے امریکا کا ایک اہم سفارتی مرکز سمجھا جاتا تھا۔ خطے میں مختلف سفارتی اور انتظامی سرگرمیوں کے حوالے سے اس کی خاص اہمیت رہی ہے۔
امریکی محکمہ خارجہ کے حکام کا کہنا ہے کہ قونصل خانے کی بندش سے ہر سال تقریباً پچھتر لاکھ ڈالر کی بچت ہوگی۔ حکام کے مطابق اس فیصلے سے پاکستان میں امریکا کے قومی مفادات یا سفارتی سرگرمیوں پر کسی قسم کا منفی اثر نہیں پڑے گا۔
ذرائع کے مطابق سن دو ہزار ایک میں افغانستان پر امریکی حملے سے پہلے، اس کے دوران اور اس کے بعد بھی پشاور میں قائم یہ قونصل خانہ مختلف کارروائیوں اور رسدی معاملات کے لیے ایک اہم مرکز کے طور پر استعمال ہوتا رہا۔
رپورٹ میں بتایا گیا ہے کہ اس فیصلے پر ایک سال سے زائد عرصے سے غور کیا جا رہا تھا۔ حکام کے مطابق یہ اقدام سابق امریکی صدر ڈونلڈ ٹرمپ کی انتظامیہ کی جانب سے وفاقی اداروں کے حجم میں کمی کے منصوبے کا حصہ ہے۔ حکام نے واضح کیا ہے کہ اس فیصلے کا ایران کے ساتھ کسی ممکنہ جنگ سے کوئی تعلق نہیں۔
یہ بھی پڑھیں : خیبرپختونخوا میں اعلی افسران کے تبادلے
محکمہ خارجہ کی تنظیم نو کے دوران گزشتہ سال ہزاروں سفارتی اہلکاروں کو ملازمتوں سے فارغ کیا گیا تھا جبکہ امریکی ادارہ برائے بین الاقوامی ترقی کے عملے کو بھی بڑی حد تک برطرف کر دیا گیا تھا۔ تاہم پشاور کا قونصل خانہ اس تنظیم نو کے نتیجے میں مکمل طور پر بند ہونے والا پہلا بیرون ملک سفارتی مرکز ہوگا۔
اطلاعات کے مطابق پشاور میں قائم امریکی قونصل خانے میں اس وقت اٹھارہ امریکی سفارتکار اور دیگر سرکاری اہلکار جبکہ نواسی مقامی ملازمین خدمات انجام دے رہے ہیں۔
ذرائع کا کہنا ہے کہ قونصل خانے کو بند کرنے کے عمل پر تقریباً تیس لاکھ ڈالر خرچ ہوں گے۔ اس رقم کا بڑا حصہ عارضی دفاتر کے طور پر استعمال ہونے والے بکتر بند ٹریلروں کی منتقلی پر خرچ کیا جائے گا جبکہ باقی رقم گاڑیوں، برقی اور مواصلاتی آلات اور دیگر دفتری سامان کو اسلام آباد میں قائم امریکی سفارت خانے اور کراچی و لاہور کے قونصل خانوں منتقل کرنے پر خرچ کی جائے گی۔
محکمہ خارجہ کے مطابق قونصل خانے کی بندش کے بعد امریکی شہریوں اور دیگر افراد کے قونصل خانے سے متعلق معاملات اب اسلام آباد میں قائم امریکی سفارت خانہ نمٹائے گا۔
