متحدہ عرب امارات کے شہر فجیرا سے تیل سے بھرے دو جہاز بحفاظت کراچی پہنچ گئے ہیں۔ حکام کے مطابق دونوں جہازوں میں تقریباً دس سے بارہ کروڑ لیٹر تیل موجود تھا جسے کامیابی کے ساتھ کراچی منتقل کر دیا گیا۔
حکام کا کہنا ہے کہ فجیرا سے کراچی تک جہازوں کی منتقلی کے دوران پاکستان کی بحریہ نے حفاظتی حصار فراہم کیا تاکہ سفر کے دوران کسی بھی ممکنہ خطرے سے بچا جا سکے۔
پاکستان قومی جہاز رانی ادارے کے حکام کے مطابق فجیرا کی بندرگاہ کے قریب حالیہ حملوں کے واقعات کے بعد جہازوں کی محفوظ منتقلی کے لیے بحریہ کی نگرانی ضروری قرار دی گئی تھی۔
وفاقی وزیر برائے بحری امور جنید انور نے جہازوں کی محفوظ کراچی آمد پر پاکستان بحریہ کا شکریہ ادا کرتے ہوئے کہا کہ قومی مفاد کے اس اہم کام میں بحریہ نے بھرپور تعاون فراہم کیا۔
یہ بھی پڑھیں : امریکہ نے پشاور میں موجود قونصل خانے کے بارے میں بڑا فیصلہ کر لیا
انہوں نے مزید بتایا کہ خلیج فارس میں موجود مزید دو جہازوں کو بھی بحفاظت نکالنے کے لیے اقدامات کیے جا رہے ہیں۔ اس سلسلے میں وزارتِ خارجہ سے درخواست کی گئی ہے کہ ایران سے رابطہ کر کے وہاں موجود جہازوں کی محفوظ واپسی کے لیے مدد حاصل کی جائے۔
حکام کے مطابق حکومت کی کوشش ہے کہ خطے میں موجود پاکستانی جہازوں اور عملے کی حفاظت کو یقینی بنایا جائے اور ملک کو درکار تیل کی فراہمی بغیر کسی رکاوٹ کے جاری رکھی جائے۔
