اسلام آباد: وزارت خزانہ نے پیٹرولیم مصنوعات کی قیمتوں میں ممکنہ اضافے کے اثرات سے عوام کو بچانے کے لیے اہم اقدام کرتے ہوئے مالی معاونت فراہم کرنے کا فیصلہ کر لیا ہے۔
اس اقدام کا مقصد یہ یقینی بنانا ہے کہ عالمی منڈی میں تیل کی قیمتوں میں اضافے کے باوجود قیمتوں کا بوجھ براہِ راست عوام پر منتقل نہ ہو۔
وزارت خزانہ کے جاری اعلامیے کے مطابق آئل اینڈ گیس ریگولیٹری اتھارٹی (او جی آر اے) کو 27 ارب روپے کی پہلی قسط جاری کر دی گئی ہے۔
یہ رقم وزیراعظم شہباز شریف کے اخراجات میں کمی کے تحت قائم خصوصی فنڈ سے فراہم کی گئی ہے، تاکہ شہریوں کو فوری مالی ریلیف فراہم کیا جا سکے اور مہنگائی کے دباؤ کو کم کیا جا سکے۔
اعلامیے میں بتایا گیا ہے کہ حکومت عالمی منڈی میں تیل کی قیمتوں میں اضافے کے باوجود عوام کو ریلیف دینے کے لیے قیمتوں کے فرق کو خود برداشت کرے گی۔
وزارت خزانہ کے مطابق اس مقصد کے لیے سرکاری اخراجات میں کمی کر کے وسائل جمع کیے گئے ہیں، جبکہ مزید کفایت شعاری اقدامات پر بھی غور جاری ہے تاکہ مالی نظم و ضبط برقرار رکھا جا سکے۔
یہ بھی پڑھیں : ایران نے ایک اور امریکی طیارہ مار گرایا، ویڈیو سوشل میڈیا پر وائرل
وزارت خزانہ نے مزید کہا کہ حکومت بجٹ کی حدود کے اندر رہتے ہوئے عوام کو ریلیف دینے کے لیے پرعزم ہے اور اضافی بچت حاصل کرنے کے نئے طریقوں پر کام کیا جا رہا ہے تاکہ معاشی استحکام کے ساتھ عوامی سہولت کو یقینی بنایا جا سکے۔
یہ اقدام نہ صرف عوامی مالی دباؤ کو کم کرے گا بلکہ حکومتی مالی نظم و ضبط کو بھی مضبوط کرنے میں مددگار ثابت ہوگا، اور اس سے صارفین کو مہنگائی کے اثرات سے تحفظ فراہم ہوگا۔
