دبئی اور متحدہ عرب امارات میں طوفانی بارشیں، ژالہ باری سے کئی علاقے متاثر

پاکستان, پختونخوا ڈیجیٹل, تازہ ترین, دنیا / Leave a Comment /

دبئی: متحدہ عرب امارات کی مختلف ریاستوں میں طوفانی بارشیں جاری ہیں، جن کے باعث کئی علاقوں میں پانی جمع ہوگیا ہے اور شہریوں کو شدید مشکلات کا سامنا ہے۔

رپورٹس کے مطابق دبئی، شارجہ اور دیگر علاقوں میں موسلا دھار بارش کے ساتھ کچھ مقامات پر ژالہ باری بھی ہوئی۔ دبئی پولیس نے عوام کو خبردار کیا ہے کہ حدِ نگاہ میں کمی اور ژالہ باری کے باعث غیر ضروری سفر سے گریز کیا جائے تاکہ کسی حادثے سے بچا جا سکے۔

دبئی انتظامیہ نے کہا ہے کہ موسم صبح تک غیر مستحکم رہنے کا امکان ہے، اس لیے شہری محتاط رہیں اور موسم کی تازہ ترین صورتحال پر نظر رکھیں۔

متحدہ عرب امارات کے محکمۂ اوقاف نے بھی شہریوں کو ہدایت کی ہے کہ موسم کی شدت کے پیش نظر نمازیں گھر میں ادا کی جائیں تاکہ حفاظتی اقدامات کو یقینی بنایا جا سکے۔

دوسری جانب عمان میں بھی طوفانی بارشوں کے اثرات شدید دیکھنے کو ملے، جہاں سیلابی ریلے گاڑیوں کو بہا کر لے گئے اور لوگوں کے لیے خطرہ پیدا ہو گیا۔

مشرق وسطیٰ کے دیگر ممالک میں بھی طوفانی بارشوں اور سیلابی حالات کی اطلاعات موصول ہو رہی ہیں، جس سے مقامی انتظامیہ نے عوام سے محتاط رہنے کی ہدایت جاری کی ہے۔

Must Read

Scroll to Top