پشاور ہائیکورٹ نے خیبرپختونخوا میں سیکیورٹی کی خراب صورتحال پر وفاق اور صوبائی حکومت سمیت دیگر فریقین کو نوٹس جاری کر دیا۔ عدالت نے صوبائی سیکرٹری داخلہ، آئی جی پولیس سمیت دیگر سے جواب بھی طلب کر لیا ہے۔
جسٹس سید ارشد علی اور جسٹس ڈاکٹر خورشید اقبال پر مشتمل 2 رکنی بینچ نے درخواست پر سماعت کی، وکیل درخواست گزار سجاد احمد محسود نے کہا کہ جنوبی اضلاع میں سیکیورٹی صورتحال انتہائی خراب ہیں، جس کی وجہ سے شہریوں کی جانیں محفوظ نہیں،
یہ بھی پڑھیں:پشاورمیں پولیس اہلکارسمیت 2 افراد کو قتل کردیاگیا
عدالت نے وکیل سے استفسار کیا کہ اس میں جواب کس سے طلب کریں وکیل نے جواب دیا کہ وفاقی، صوبائی حکومت اور دیگر متعلقہ فریقین سے جواب طلب کیا جائے۔
عدالت نے وکیل کی درخواست پر وفاقی، صوبائی حکومت، وفاقی و صوبائی سیکرٹری داخلہ، آئی جی پولیس اور دیگر فریقین کو نوٹس جاری کرتے ہوئے آئندہ سماعت پر جواب طلب کرلیا۔
