بنگلا دیش نیشنل کرکٹ ٹیم نے شاندار کارکردگی کا مظاہرہ کرتے ہوئے پاکستان نیشنل کرکٹ ٹیم کو دوسرے ٹیسٹ میچ میں بھی شکست دے کر سیریز 2-0 سے اپنے نام کرلی۔ سلہٹ میں کھیلے گئے دوسرے اور آخری ٹیسٹ میں کامیابی کے ساتھ ہی بنگلا دیش نے پہلی بار ہوم گراؤنڈ پر پاکستان کے خلاف تاریخی کلین سوئپ مکمل کرلیا۔
بنگلا دیشی کھلاڑیوں نے میچ میں پاکستان پر برتری ثابت کی۔ بیٹنگ، باؤلنگ اور فیلڈنگ میں میزبان ٹیم نے شاندار کھیل پیش کرتے ہوئے قومی ٹیم کو سنبھلنے کا موقع نہ دیا۔ پاکستان کی بیٹنگ لائن ایک بار پھر دباؤ کا شکار رہی جبکہ اہم مواقع پر وکٹیں گرنے سے ٹیم میچ میں واپسی نہ کرسکی۔
ٹیسٹ سیریز میں مسلسل دو شکستوں کے بعد پاکستانی شائقین کرکٹ شدید مایوسی کا شکار ہیں، جبکہ بنگلا دیشی ٹیم اور اس کے مداح تاریخی فتح کا جشن منا رہے ہیں۔ کرکٹ ماہرین کے مطابق یہ کامیابی بنگلا دیشی کرکٹ کیلئے ایک اہم سنگ میل کی حیثیت رکھتی ہے۔
دوسری جانب قومی ٹیم کی خراب کارکردگی پر سوالات اٹھنا شروع ہوگئے ہیں اور ٹیم مینجمنٹ و کھلاڑیوں پر شدید تنقید کی جارہی ہے۔ شائقین کا کہنا ہے کہ پاکستان ٹیم کو اپنی حکمت عملی اور کارکردگی میں فوری بہتری لانے کی ضرورت ہے۔
