اٹامک انرجی کینسر ہسپتال انمول میں پہلے رضاکارانہ پروگرام کا باقاعدہ آغاز کر دیا گیا ہےجس کا مقصد ہسپتال آنے والے کینسر کے مریضوں کی مدد اور رہنمائی کے لیے نوجوان طلبہ کو اکٹھا کرنا اور ساتھ ہی نوجوانوں میں ہمدردی، سماجی خدمت اور شہری ذمہ داری کے کلچر کو فروغ دینا ہے۔
رضاکارانہ پروگرام کی افتتاحی تقریب انمول ہسپتال میں منعقد ہوئی جس میں پاکستان اٹامک انرجی کمیشن کے ممبر سائنس ڈاکٹر شکیل عباس روفی، ڈائریکٹر انمول ہسپتال ڈاکٹر آرزو فاطمہ سلیم، فیکلٹی ممبران، طبی ماہرین اور تعلیمی اداروں کے نمائندوں نے شرکت کی۔
مختلف اسکولوں اور کالجوں سے منتخب کیے گئے 22 طلبہ کے گروپ کو رضاکاروں کے پہلے بیچ میں شامل کیا گیا ہے۔ ایک ماہ کی باقاعدہ مصروفیت کے دوران، یہ طلبہ مریضوں اور ان کے تیمارداروں کی مدد کریں گے، ہسپتال کے اندر رہنمائی فراہم کریں گے، اور مریضوں کی سہولت کے لیے مختلف خدمات انجام دیں گے تاکہ علاج معالجے کے مجموعی تجربے کو بہتر بنایا جا سکے۔
تقریب سے خطاب کرتے ہوئے ڈاکٹر شکیل عباس روفی نے نوجوانوں کو سماجی خدمت کے بامقصد اقدامات میں شامل کرنے کی اہمیت پر روشنی ڈالی۔
انہوں نے اعلان کیا کہ اس پروگرام کو ایک پائلٹ پروجیکٹ کے طور پر شروع کیا گیا ہے، جسے بعد میں ملک بھر میں اٹامک انرجی کمیشن کے زیر انتظام چلنے والے تمام 21 کینسر ہسپتالوں تک پھیلایا جائے گا تاکہ مریضوں کی سہولت کو مزید بہتر اور ہیلتھ کیئر سروسز میں عوامی شرکت کو مضبوط کیا جا سکے۔
ڈائریکٹر انمول ہسپتال ڈاکٹر آرزو فاطمہ سلیم نے حصہ لینے والے طلبہ کے لیے اس اقدام کی تعلیمی اور پیشہ ورانہ اہمیت پر زور دیا۔
انہوں نے کہا کہ ہسپتال کے ماحول سے براہ راست روشناس ہونے سے طلبہ میں ہمدردی، رابطے کی مہارت، ٹیم ورک اور سماجی خدمت کی گہری سمجھ پیدا کرنے میں مدد ملے گی۔
تقریب کے اختتام پر ڈاکٹر شکیل عباس روفی نے منتخب طلبہ میں خصوصی رضاکار کٹس تقسیم کیں جس کے ساتھ ہی ہسپتال میں ان کی رضاکارانہ خدمات کا باقاعدہ آغاز ہو گیا۔
