دریا میں نہاتے ہوئے دو بچے پانی میں ڈوب گئے۔ امدادی کارروائی کے دوران ایک بچے کی لاش برآمد کر لی گئی ہے جبکہ دوسرے کی تلاش کے لیے مقامی افراد اور رضاکار سرگرم ہیں۔
خیبر پختونخوا کے ضلع دیر بالا کے علاقے اخگرام میں افسوسناک واقعہ پیش آیا ہے، جہاں گرمی کی شدت کے باعث دریا میں نہانے گئے دو بچے ڈوب گئے۔ واقعے کے بعد علاقے میں کہرام مچ گیا اور ریسکیو سرگرمیاں شروع کر دی گئیں۔
مقامی ذرائع کے مطابق دونوں بچے دریا میں نہا رہے تھے کہ اچانک گہرے پانی میں چلے گئے اور ڈوب گئے۔ اطلاع ملتے ہی مقامی افراد اور رضاکاروں نے فوری طور پر امدادی کارروائیاں شروع کیں۔
ریسکیو کارروائی کے دوران ایک بچے کی لاش دریا سے نکال لی گئی ہے، جبکہ دوسرا بچہ تاحال لاپتا ہے۔ لاپتا بچے کی تلاش کے لیے مقامی رضاکار اور اہل علاقہ اپنی مدد آپ کے تحت سرچ آپریشن میں مصروف ہیں۔
یہ بھی پڑھیں: الوداع! 2026 ورلڈ کپ میرا آخری ٹورنامنٹ ہوگا، کرسٹیانو رونالڈو نے بالآخر حتمی اعلان کر دیا
عینی شاہدین کے مطابق دریا میں پانی کے تیز بہاؤ اور گہرائی کے باعث ریسکیو کاموں میں مشکلات پیش آ رہی ہیں۔ آخری اطلاعات تک لاپتا بچے کا کوئی سراغ نہیں مل سکا۔
علاقہ مکینوں نے ضلعی انتظامیہ سے اپیل کی ہے کہ جدید آلات اور ریسکیو ٹیموں کو فوری طور پر علاقے میں روانہ کیا جائے تاکہ لاپتا بچے کو جلد از جلد تلاش کیا جا سکے۔
