محکمہ کالجز سندھ نے صوبے بھر کے سرکاری کالجز میں انٹرمیڈیٹ کلاسز کے داخلوں کے لیے امیدواروں کی فہرست جاری کر دی ہے، جس کے بعد طلبہ کے لیے داخلہ حاصل کرنے کا مرحلہ شروع ہو گیا ہے۔
محکمہ کالجز سندھ کے مطابق انٹرمیڈیٹ میں داخلوں کے لیے صوبے بھر سے ایک لاکھ 60 ہزار سے زائد درخواستیں موصول ہوئیں۔ سب سے زیادہ درخواستیں کراچی سے جمع کرائی گئیں، جہاں 98 ہزار 646 طلبہ نے سرکاری کالجز میں داخلے کے لیے اپلائی کیا۔
حکام کے مطابق طلبہ کو اپنی پسند کے کالج میں داخلہ حاصل کرنے کے لیے مقررہ میرٹ پر پورا اترنا ہوگا۔ داخلہ عمل کو شفاف بنانے کے لیے درخواستوں کی جانچ پڑتال کے بعد میرٹ لسٹ تیار کی گئی ہے، جس کی بنیاد پر طلبہ کو مختلف کالجز میں داخلے دیے جائیں گے۔
ڈائریکٹر جنرل کالجز سندھ نے طلبہ کو ہدایت کی ہے کہ وہ مقررہ وقت کے اندر اپنے داخلوں کی تصدیق مکمل کرائیں تاکہ نئے تعلیمی سال کا آغاز بروقت کیا جا سکے۔
یہ بھی پڑھیں : کوہستان کرپشن اسکینڈل میں بڑی پیش رفت، نیب نے مزید کروڑوں روپے ریکور کر لیے
محکمہ کالجز سندھ کے مطابق طلبہ 31 جولائی تک اپنے داخلے کنفرم کر سکتے ہیں، بصورت دیگر مقررہ وقت گزرنے کے بعد انہیں مشکلات کا سامنا کرنا پڑ سکتا ہے۔
تعلیمی ماہرین کا کہنا ہے کہ سرکاری کالجز میں داخلوں کے لیے بڑی تعداد میں درخواستوں کا موصول ہونا طلبہ اور والدین کے سرکاری تعلیمی اداروں پر اعتماد کی علامت ہے۔
دوسری جانب والدین اور طلبہ نے مطالبہ کیا ہے کہ داخلہ عمل کو مزید آسان اور شفاف بنایا جائے تاکہ کسی قسم کی پریشانی کا سامنا نہ کرنا پڑے۔
