پشاور: گزشتہ روز سے جاری بارشوں کی وجہ سے خیبر پختونخوا کے مختلف علاقوں میں بجلی کی ترسیل متاثر ہو گئی ہے۔ پیسکو (پشاور الیکٹرک سپلائی کمپنی) کے ترجمان کے مطابق سوات، بنوں، صوابی اور مانسہرہ کے کئی علاقے متاثر ہوئے ہیں۔
ترجمان پیسکو کے مطابق 37 فیڈرز ٹرپ ہو چکے ہیں، جبکہ 26 فیڈرز فالٹ کی وجہ سے بند ہیں۔ متاثرہ علاقوں میں سیٹھی ٹاؤن، تاج آباد، داؤدزئی، دلہ ذاک، کریم پورہ اور پیر بالا شامل ہیں۔
پیسکو حکام نے بتایا کہ کمپنی کا عملہ بجلی کی بحالی کے لیے کام کر رہا ہے اور اختر حمید، پیسکو کے چیف ایگزیکٹو آفیسر کی ہدایت پر فیلڈ سٹاف کو ہائی الرٹ کر دیا گیا ہے۔
متعدد علاقوں میں متبادل روٹس سے بجلی فراہم کی جا رہی ہے، جبکہ بارش کی شدت میں کمی کے ساتھ ہی دیگر متاثرہ علاقوں میں بھی بجلی کی بحالی کا عمل شروع کر دیا جائے گا۔
پیسکو کی جانب سے صارفین سے درخواست کی گئی ہے کہ وہ بارش کے دوران بجلی کی تنصیبات سے دور رہیں تاکہ کسی بھی قسم کے حادثات سے بچا جا سکے۔
یہ بھی پڑھیں جاتی سردی لوٹ آئی ، پشاور سمیت خیبر پختونخوا میںگرج چمک کیساتھ بارش ، برفباری
ایمرجنسی کی صورت میں پیسکو کی ہیلپ لائن 118 پر مفت کال کی جا سکتی ہے۔ خراب موسم کے باعث عوام سے تعاون کی اپیل کی گئی ہے تاکہ بجلی کی بحالی کے عمل کو تیز کیا جا سکے۔
