گورنر خیبرپختونخوا فیصل کریم کنڈی نے وزیراعلی علی امین گنڈاپور کو خط لکھتے ہوئے مطالبہ کیا ہے کہ مخصوص نشستوں پر منتخب اراکین سے حلف لینے کیلئے صوبائی اسمبلی کا اجلاس بلایا جائے۔
تفصیلات کے مطابق گورنر کی جانب سے لکھے گئے خط میں کہا گیا ہے کہ 14 جولائی کو الیکشن کمیشن نے بھی خط کے ذریعے اسمبلی اجلاس بلانے کا کہا ہے تا کہ سپریم کورٹ کے آئینی بنچ کے فیصلے کے مطابق مخصوص نشستوں پر منتخب اراکین سے حلف لیا جائے۔
خط میں کہا گیا ہے کہ خیبرپختونخوا گورنمنٹ رولز آف بزنس 1985، شیڈول 5، رول 36 (1) کے تحت اسمبلی اجلاس کیلئے وزیراعلیٰ گورنر کو کہیں گے اس لئے آرٹیکل 109 اے کے تحت فوری طور پر اسمبلی اجلاس بلایا جائے تاکہ سپریم کورٹ کے فیصلے پر من و عن عمل کرایا جائے۔
واضح رہے کہ خیبرپختونخوا میں 21 جولائی کو سینیٹ انتخابات ہورہے ہیں لیکن سپریم کورٹ کے فیصلے کے بعد ابھی تک مخصوص نشستوں پر منتخب اراکین سے حلف نہیں لیا گیا ہے۔سپریم کورٹ کے آئینی بنچ نے مخصوص نشستوں کے مقدمے میں پی ٹی آئی کے خلاف فیصلہ سنایا تھا۔
