عدالت کی اجازت کے باوجود امیگریشن حکام کا اقدام ،شیخ رشید کو بیرون ملک روانگی سے روک دیا گیا
تفصیلات کے مطابق عوامی مسلم لیگ کے سربراہ شیخ رشید احمد کو عمرے کے لیے بیرونِ ملک روانگی سے روک دیا گیا۔ وہ بدھ کے روز (آج)اسلام آباد ایئرپورٹ سے عمرے پر روانہ ہونے کے لیے پہنچے تھے۔
ایئرپورٹ پر میڈیا سے گفتگو کرتے ہوئے شیخ رشید کا کہنا تھا کہ عدالت نے انہیں عمرے پر جانے کی خصوصی اجازت دی تھی، اس کے باوجود امیگریشن حکام نے انہیں روک لیا۔انہوں نے کہا کہ وہ اس اقدام کے خلاف توہینِ عدالت کی درخواست دائر کریں گے۔
واضح رہے کہ چند روز قبل لاہور ہائیکورٹ راولپنڈی بینچ نے شیخ رشید احمد کو بیرون ملک جانے کی اجازت دی تھی۔ سماعت کے دوران ان کے وکیل سردار عبدالرازق نے مؤقف اختیار کیا تھا کہ عدالت کے حکم کے باوجود شیخ رشید کا نام ایگزٹ کنٹرول لسٹ (ECL) سے نکالنے کے بعد پاسپورٹ کنٹرول لسٹ (PCL) اور پی این آئی ایل میں دوبارہ شامل کر دیا گیا ہے۔
وکیل نے عدالت کو بتایا تھا کہ آئین ہر شہری کو بیرون ملک سفر اور آزادانہ نقل و حرکت کا بنیادی حق دیتا ہے۔دوسری جانب ایف آئی اے کے مطابق، شیخ رشید کا نام انسدادِ دہشت گردی عدالت کے حکم پر پاسپورٹ کنٹرول لسٹ میں شامل کیا گیا ہے۔
عدالت کے فاضل جج جسٹس صداقت علی نے اپنے ریمارکس میں کہا تھا کہ ’’شیخ رشید کو عمرے کے لیے جانے دیا جائے، وہ دعا کریں گے تو ملک کے حالات بہتر ہو جائیں گے۔‘‘
