خیبرپختونخوا کے شہر ڈیرہ اسماعیل خان میں دہشت گردوں نے کسٹمز آفس اور پولیس اہلکاروں کو نشانہ بنایا، جس کے نتیجے میں دو اہلکار شہید جبکہ دو زخمی ہو گئے۔ حملے کے بعد علاقے میں خوف و ہراس پھیل گیا اور سیکیورٹی فورسز نے فوری طور پر کارروائی شروع کر دی۔
پولیس کے مطابق شہید ہونے والوں میں کسٹمز اہلکار اسرار خان اور پولیس اہلکار محمد بلال شامل ہیں۔ زخمی اہلکاروں میں حضرت عمر اور خیال محمد شامل ہیں، جنہیں فوری طور پر ڈسٹرکٹ ہیڈکوارٹر (ڈی ایچ کیو) ٹراما سینٹر منتقل کر دیا گیا، جہاں انہیں طبی امداد فراہم کی جا رہی ہے۔ شہید اہلکاروں کی میتیں بھی ہسپتال منتقل کر دی گئی ہیں۔
پولیس ترجمان کے مطابق حملہ آوروں نے سی پیک روٹ پر چلنے والی مسافر بسوں پر بھی فائرنگ کی، جس سے مسافروں میں شدید خوف و ہراس پھیل گیا۔ دہشت گردوں نے کسٹمز کی گاڑیوں کو بھی نذرِ آتش کر دیا، جس کے باعث سرکاری املاک کو نقصان پہنچا۔
پولیس کا کہنا ہے کہ فورسز کی جوابی کارروائی کے بعد حملہ آور موقع سے فرار ہو گئے۔ واقعے کی اطلاع ملتے ہی پولیس اور دیگر سیکیورٹی اداروں کی بھاری نفری جائے وقوعہ پر پہنچ گئی اور علاقے کو گھیرے میں لے لیا گیا۔
حکام کے مطابق علاقے میں سرچ آپریشن جاری ہے اور حملے میں ملوث عناصر کی گرفتاری کے لیے مختلف مقامات پر چھاپے مارے جا رہے ہیں۔ سیکیورٹی اداروں کا کہنا ہے کہ صورتحال کو قابو میں کر لیا گیا ہے، جبکہ واقعے کی مکمل تحقیقات جاری ہیں تاکہ ذمہ داران کو قانون کے کٹہرے میں لایا جا سکے۔
