اسلام آباد میں بانی پاکستان تحریک انصاف عمران خان کی صحت کے معاملے پر اپوزیشن کے دھرنے چھٹے روز میں داخل ہو گئے۔ پارلیمنٹ ہاؤس اور خیبرپختونخوا ہاؤس کے باہر الگ الگ احتجاجی کیمپ قائم ہیں جہاں اپوزیشن رہنما اور کارکنان موجود ہیں۔
پارلیمنٹ ہاؤس میں اپوزیشن اتحاد کا ایک اہم مشاورتی اجلاس بھی منعقد ہوا جس میں عمران خان کی صحت کی صورتحال پر تفصیلی غور کیا گیا۔ اجلاس کے بعد جاری اعلامیے میں حکومت کے سامنے پانچ نکاتی مطالبات پیش کیے گئے۔
اعلامیے کے مطابق اپوزیشن نے مطالبہ کیا ہے کہ بانی پی ٹی آئی تک ان کے ذاتی معالجین کو فوری اور بلا رکاوٹ رسائی دی جائے۔ اس کے علاوہ مکمل طبی رپورٹس اہل خانہ اور معالجین کو فراہم کی جائیں تاکہ صحت کی صورتحال کا درست اندازہ لگایا جا سکے۔
اپوزیشن نے یہ بھی مطالبہ کیا ہے کہ عمران خان کی مسلسل طبی نگرانی کو یقینی بنایا جائے اور ان کے ذاتی ڈاکٹروں کو ملاقات کر کے آزادانہ طبی رائے دینے کا حق دیا جائے۔ مزید برآں علاج میں کسی بھی قسم کی تاخیر پر ذمہ داران کا تعین کرتے ہوئے جوابدہی کی جائے اور آئندہ ایسے واقعات کی روک تھام کے لیے واضح یقین دہانی کرائی جائے۔
اپوزیشن رہنماؤں کا کہنا ہے کہ عمران خان کی صحت کے معاملے کو سنجیدگی سے لیا جانا چاہیے اور اس پر سیاست کے بجائے انسانی ہمدردی کو ترجیح دی جائے۔ دوسری جانب حکومتی ردعمل کا انتظار کیا جا رہا ہے، جبکہ دارالحکومت میں سیاسی سرگرمیاں بدستور جاری ہیں۔
