سعودی عرب نے امریکا اور ایران کے درمیان جنگ بندی کے لیے پاکستان کی کوششوں کا خیر مقدم کیا ہے۔ سعودی وزارت خارجہ کے ترجمان کے مطابق، خطے میں پائیدار امن اور مستقل جنگ بندی کے لیے پاکستان کی کاوشوں کی بھرپور حمایت کی جاتی ہے۔ ترجمان نے مزید کہا کہ امریکی صدر اور وزیراعظم پاکستان کی جانب سے جنگ بندی کے اعلان کا بھی خیر مقدم کیا جاتا ہے۔
دوسری جانب، متحدہ عرب امارات کے صدارتی مشیر انور قرقاش نے کہا کہ متحدہ عرب امارات نے ایک ایسی جنگ سے بچنے میں کامیابی حاصل کی، جس کا سامنا کرنا مشکل تھا۔ انہوں نے کہا کہ امارات نے اپنی خودمختاری، وقار اور کامیابیوں کا دفاع کرنے میں بھرپور کامیابی حاصل کی ہے۔
انور قرقاش نے مزید کہا کہ پیچیدہ علاقائی منظرنامے میں متحدہ عرب امارات مضبوط گرفت کے ساتھ آگے بڑھ رہا ہے، اور ان کی قوت، استقامت اور ثابت قدمی نے اماراتی ماڈل کو مزید مستحکم کیا ہے۔
یہ پیش رفت خطے میں امن کے قیام کی کوششوں میں پاکستان کے کردار کو عالمی سطح پر اجاگر کرتی ہے، اور خطے کے ممالک کی جانب سے پاکستان کی سفارتی کاوشوں کو تسلیم کرنے کا مظہر ہے۔
