چیف سیکرٹری خیبرپختونخوا، شہاب علی شاہ نے میٹرک امتحانات میں نقل کی روک تھام کے لیے سخت اقدامات کا اعلان کیا ہے۔
انہوں نے ایک اعلیٰ سطحی اجلاس کی صدارت کی، جس میں سیکرٹری تعلیم، تمام کمشنرز، تعلیمی بورڈز کے چیئرمین اور ضلعی تعلیمی افسران ویڈیو لنک کے ذریعے شریک ہوئے۔
اجلاس میں شہاب علی شاہ نے میٹرک امتحانات میں شفافیت اور میرٹ کو یقینی بنانے پر زور دیا اور کہا کہ یہ امتحانات طلبہ کے مستقبل کی تشکیل میں اہم کردار ادا کرتے ہیں۔ انہوں نے کہا کہ حکومت امتحانی نظام میں اصلاحات کے لیے پرعزم ہے اور نقل کے خاتمے کے لیے ہر ممکن اقدامات کیے جائیں گے۔
چیف سیکرٹری نے امتحانی عمل کی نگرانی کے لیے ایجوکیشن مانیٹرنگ اتھارٹی (EMA)، ضلعی انتظامیہ اور اسپیشل برانچ کو متحرک کرنے کا حکم دیا۔
انہوں نے کہا کہ امتحانات میں کسی قسم کی بے ضابطگی کو روکنے کے لیے سی سی ٹی وی کیمروں کا استعمال کیا جائے گا اور امتحانی ہالز کے معائنے کے لیے اسسٹنٹ کمشنرز کو تعینات کیا جائے گا۔
انہوں نے مزید کہا کہ مشکوک ریکارڈ رکھنے والے افسران کو امتحانی ڈیوٹیاں تفویض نہیں کی جائیں گی اور روزانہ کی بنیاد پر رپورٹس مرتب کی جائیں گی تاکہ کسی بھی غیر قانونی عمل کو فوراً روکا جا سکے۔
یہ بھی پڑھیں چیف سیکرٹری کی زیرِ صدارت ایس آئی ایف سی اجلاس، سرمایہ کاری کے فروغ کے لیے اہم اقدامات
شہاب علی شاہ نے نقل میں ملوث افراد کے خلاف سخت کارروائی کرنے کا بھی اعلان کیا اور کہا کہ امتحانات میں نقل کی کسی صورت بھی اجازت نہیں دی جائے گی۔ اس کے علاوہ، نجی تعلیمی اداروں میں قائم امتحانی ہالز پر مکمل پابندی عائد کر دی گئی ہے تاکہ نقل کے عمل کو روکا جا سکے۔
ایک اور اہم اقدام کے طور پر، انہوں نے 1 فروری کے بعد طلبہ کی مائیگریشن پر پابندی عائد کر دی تاکہ غیر ضروری تبادلے کے ذریعے فائدہ اٹھانے کی کوششوں کو روکا جا سکے۔
چیف سیکرٹری نے اس عزم کا اظہار کیا کہ نقل کا رجحان تعلیمی نظام کو تباہ کر رہا ہے اور حکومت اس بات کو یقینی بنائے گی کہ امتحانات کا عمل شفاف اور منصفانہ ہو تاکہ ملک کے لیے باصلاحیت اور قابل طلبہ تیار ہو سکیں۔
