کراچی پورٹ ٹرسٹ (کے پی ٹی) کے ترجمان نے ان تمام دعووں کو مسترد کرتے ہوئے بتایا کہ کراچی کی بندرگاہ پر تجارتی سرگرمیاں بلا تعطل جاری ہیں۔
تفصیلات کے مطابق بھارتی میڈیا کی جانب سے حالیہ دنوں میں یہ الزامات عائد کیے گئے کہ بھارت نے کراچی کی بندرگاہ کو تباہ کر دیا ہے اور یہاں تک کہ لاہور پر بھی فضائی حملہ کیا گیا ہے۔ تاہم، کراچی پورٹ ٹرسٹ (کے پی ٹی) کے ترجمان نے ان تمام دعووں کو مسترد کرتے ہوئے بتایا کہ کراچی کی بندرگاہ پر تجارتی سرگرمیاں بلا تعطل جاری ہیں۔
ترجمان کے مطابق، گزشتہ 24 گھنٹوں کے دوران کراچی بندرگاہ پر مجموعی طور پر 19 جہازوں کی ہینڈلنگ کی گئی، جن میں 7 کنٹینر شپ، 2 جنرل کارگو شپ اور 10 بلک کارگو شپ شامل تھے۔ اس کے علاوہ مزید 3 جہازوں کو بھی برتھ دی گئی۔
ترجمان نے بتایا کہ اس دوران مختلف اقسام کا مجموعی طور پر 1 لاکھ 59 ہزار 413 میٹرک ٹن کارگو ہینڈل کیا گیا، جس میں 89 ہزار 190 میٹرک ٹن درآمدی کارگو اور 70 ہزار 223 میٹرک ٹن برآمدی کارگو شامل تھے۔ ان اعداد و شمار سے واضح ہے کہ کراچی کی بندرگاہ پر سامان کی ترسیل اور نقل و حمل کے عمل میں کسی قسم کی رکاوٹ نہیں آئی اور تجارتی سرگرمیاں اپنے معمول کے مطابق جاری ہیں۔
کراچی پورٹ کے ترجمان نے مزید کہا کہ بندرگاہ پر آنے والے جہازوں کی روانی بغیر کسی خلل کے برقرار رکھی گئی ہے تاکہ تجارتی سرگرمیاں بلا تعطل جاری رہیں۔ انہوں نے اس بات پر زور دیا کہ بھارتی میڈیا کی جانب سے کئے گئے دعوے بے بنیاد اور من گھڑت ہیں۔
یاد رہے کہ بھارتی میڈیا نے اس سے قبل یہ افواہیں پھیلائی تھیں کہ بھارت نے کراچی کی بندرگاہ کو تباہ کر دیا ہے اور یہاں تک کہ لاہور پر بھی فضائی حملہ کیا ہے۔ تاہم، حقیقت یہ ہے کہ کراچی کی بندرگاہ پر تجارتی سرگرمیاں پوری طرح سے معمول کے مطابق جاری ہیں، جس سے ثابت ہوتا ہے کہ بھارتی میڈیا کے دعوے سراسر جھوٹے تھے۔
