خیبر پختونخوا کے مختلف علاقوں میں آج تیز ہواؤں، گرج چمک اور موسلادھار بارش کا امکان ہے۔ محکمہ موسمیات نے شہریوں کو ممکنہ موسمی صورتحال کے پیشِ نظر احتیاط برتنے کی ہدایت کی ہے، جبکہ ضلعی انتظامیہ اور ریسکیو اداروں کو الرٹ کر دیا گیا ہے۔
محکمہ موسمیات کے مطابق صوبے کے متعدد اضلاع میں گرج چمک کے ساتھ بارش متوقع ہے، جن میں درج ذیل علاقے شامل ہیں۔
بالائی علاقے: دیر، چترال، سوات، کوہستان، مالاکنڈ، شانگلہ، بٹگرام، بونیر
قبائلی اور مرکزی اضلاع: باجوڑ، مہمند، خیبر، اورکزئی، کرم، وزیرستان
ہزارہ اور وسطی علاقوں: مانسہرہ، ایبٹ آباد، ہری پور، صوابی، پشاور، مردان، ہنگو، کوہاٹ، بنوں، ڈیرہ اسماعیل خان
محکمہ موسمیات کے مطابق چند مقامات پر موسلادھار بارش کی بھی توقع ہے، جس سے نشیبی علاقوں میں پانی جمع ہونے اور مقامی ندی نالوں میں طغیانی کا خدشہ موجود ہے۔
مزید برآں، آزاد کشمیر اور گلگت بلتستان میں بھی بعض مقامات پر گرج چمک کے ساتھ بارش کی پیشگوئی کی گئی ہے۔
محکمہ موسمیات نے شہریوں، خصوصاً پہاڑی علاقوں میں رہنے والوں سے کہا ہے کہ وہ سفر کے دوران احتیاط برتیں، ندی نالوں کے قریب جانے سے گریز کریں اور موسمی صورتحال سے باخبر رہیں۔
