پاک فضائیہ نے گلگت بلتستان میں حالیہ سیلاب سے متاثرہ علاقوں میں بڑے پیمانے پر امدادی آپریشن کامیابی سے مکمل کر لیا ہے۔ سخت موسمی حالات اور دشوار گزار پہاڑی راستوں کے باوجود سی-130 طیاروں کے ذریعے خوراک، ادویات اور بنیادی اشیائے ضرورت کی ترسیل ممکن بنائی گئی۔
پاک فوج کے شعبہ تعلقات عامہ (آئی ایس پی آر) کے مطابق، پی اے ایف بیس نور خان سے گلگت کے لیے 7 ٹن پر مشتمل امدادی سامان روانہ کیا گیا، جس میں خشک راشن، روزمرہ استعمال کی اشیاء اور جان بچانے والی ادویات شامل تھیں۔یہ سامان نیشنل ڈیزاسٹر مینجمنٹ اتھارٹی (NDMA) کے تعاون سے دور دراز وادیوں میں تقسیم کیا جا رہا ہے، جہاں سیلاب کے باعث سڑکیں ٹوٹ جانے کی وجہ سے مقامی آبادی امداد سے محروم تھی۔
آئی ایس پی آر کے مطابق، پاک فضائیہ کی ریلیف ٹیم نے متاثرہ علاقوں سے 75 پھنسے ہوئے افراد کو بھی بحفاظت نکال کر محفوظ مقامات تک منتقل کیا۔یہ مربوط اور بروقت کارروائی ملک گیر ایمرجنسی ریلیف مہم کا حصہ ہے، جو قدرتی آفات کے دوران انسانی جانوں کے تحفظ کے لیے مسلح افواج کے غیر متزلزل عزم کی عکاسی کرتی ہے۔
ترجمان کے مطابق، آئندہ دنوں میں بھی پاک فضائیہ کے طیارے اور زمینی ٹیمیں امدادی سرگرمیوں میں مصروف رہیں گی اور متاثرہ خاندانوں کو خوراک، رہائش، طبی امداد اور بنیادی سہولیات فراہم کی جاتی رہیں گی۔
’’پاک فضائیہ کے بروقت اور جرات مندانہ ردعمل نے گلگت بلتستان کے متاثرہ خاندانوں کو نئی امید دی ہے۔ یہ اقدام اس حقیقت کا ثبوت ہے کہ مسلح افواج ہر مشکل گھڑی میں قوم کے ساتھ کھڑی ہوتی ہیں۔‘‘
