ملک کے مختلف علاقوں میں موسم نے کروٹ بدل لی ہے، محکمہ موسمیات نے آئندہ دنوں میں خیبر پختونخوا، جنوبی بلوچستان، زیریں سندھ اور شمال مشرقی پنجاب سمیت کئی علاقوں میں گرج چمک کے ساتھ بارش کی پیشگوئی کر دی ہے۔
محکمہ موسمیات کے مطابق جنوبی بلوچستان اور زیریں سندھ میں تیز ہواؤں، آندھی اور گرج چمک کے ساتھ بارش متوقع ہے، جب کہ جنوبی بلوچستان کے بعض علاقوں میں موسلا دھار بارش کا بھی امکان ہے۔ خیبر پختونخوا کے شہروں ایبٹ آباد، مانسہرہ اور بٹگرام میں بھی بارش کا امکان ظاہر کیا گیا ہے۔
ادھر شمال مشرقی پنجاب، کشمیر اور ملحقہ پہاڑی علاقوں میں مطلع جزوی ابرآلود رہے گا اور چند مقامات پر تیز ہواؤں اور گرج چمک کے ساتھ بارش ہونے کی توقع ہے۔ اسلام آباد میں بھی مطلع جزوی ابر آلود رہنے کا امکان ظاہر کیا گیا ہے۔
محکمہ موسمیات کا کہنا ہے کہ مری، جہلم، گلیات، راولپنڈی، سیالکوٹ، نارووال، گجرات اور گرد و نواح میں بارش کی توقع ہے، جب کہ خیبر پختونخوا کے شہروں ایبٹ آباد، مانسہرہ اور بٹگرام میں بھی بارش کا امکان ظاہر کیا گیا ہے۔
بلوچستان کے مختلف علاقوں بشمول لسبیلہ، اورماڑہ، پسنی، جیوانی، گوادر، خضدار، آواران، خاران اور پنجگور میں بھی بارش متوقع ہے۔ سندھ کے ساحلی اور زیریں علاقوں کراچی، حیدرآباد، سجاول، ٹھٹھہ اور بدین میں بارش کا امکان ہے، جبکہ جامشورو اور دادو میں گرج چمک کے ساتھ بارش کی پیشگوئی کی گئی ہے۔
محکمہ موسمیات کے مطابق آزاد کشمیر اور ملحقہ علاقوں میں بھی چند مقامات پر بارش ہو سکتی ہے، جب کہ گلگت بلتستان میں موسم خشک اور مطلع جزوی طور پر ابر آلود رہنے کا امکان ہے۔
گزشتہ 24 گھنٹوں کے دوران سندھ کے کئی علاقوں میں تیز ہواؤں اور گرج چمک کے ساتھ بارش ہوئی، بعض مقامات پر موسلا دھار بارش بھی ریکارڈ کی گئی۔ اس کے علاوہ شمال مشرقی و جنوبی پنجاب، بالائی خیبرپختونخوا، بلوچستان اور گلگت بلتستان کے چند ایک علاقوں میں بھی ہلکی بارش دیکھنے میں آئی۔
محکمہ موسمیات نے شہریوں کو ہدایت کی ہے کہ موسم کی ممکنہ شدت کے پیش نظر احتیاطی تدابیر اختیار کریں، خاص طور پر نشیبی علاقوں میں رہنے والے افراد الرٹ رہیں۔
