دنیا بھر میں آج پشتون کلچر ڈے بڑے جوش و خروش کے ساتھ منایا جا رہا ہے۔ اس موقع پر پشتون ثقافت، روایات اور تاریخی ورثے کو زندہ رکھنے کے لیے مختلف تقریبات کا انعقاد کیا جا رہا ہے۔
تفصیلات کے مطابق کوئٹہ میٹروپولیٹن کارپوریشن میں دن کی مناسبت سے مرکزی تقریب منعقد کی جائے گی جس میں مقامی رہنما، فنکار اور ثقافتی شخصیات شرکت کریں گی۔ اس کے علاوہ پشتو اکیڈمی کوئٹہ میں بھی خصوصی پروگرام کا انعقاد کیا جائے گا جہاں پشتون ثقافت کی خوبصورتی اور قدیم روایات کو اجاگر کیا جائے گا۔
بلوچستان کے دیگر اضلاع میں بھی پشتون کلچر ڈے کی مناسبت سے ثقافتی تقریبات کا اہتمام کیا گیا ہے جن میں پشتون ثقافت کی مختلف جہتوں کو سامنے لایا جائے گا۔ ان تقریبات میں روایتی موسیقی، رقص، دستکاری، اور زبان کی اہمیت پر زور دیا جائے گا۔
یہ پروگرام نہ صرف ثقافت کو زندہ رکھنے کا ذریعہ ہیں بلکہ نئی نسل کو اپنی جڑوں سے جوڑنے میں بھی مددگار ثابت ہو رہے ہیں۔ پشتون کلچر ڈے کے ذریعے یہ پیغام دیا جا رہا ہے کہ اپنی ثقافت اور شناخت پر فخر کرنا ہر فرد کی ذمہ داری ہے۔
