وزیراعظم پاکستان شہباز شریف ایک اعلیٰ سطحی وفد کے ہمراہ مصر روانہ ہو گئے ہیں، جہاں وہ شرم الشیخ میں ہونے والے عالمی امن سربراہی اجلاس میں شرکت کریں گے۔ وزیراعظم کو یہ دعوت امریکی صدر ڈونلڈ ٹرمپ اور مصری صدر عبدالفتاح السیسی کی جانب سے دی گئی ہے۔
قومی اخبار (روزنامہ جنگ ویب سائٹ)کے مطابق وزیراعظم کے ہمراہ نائب وزیراعظم اسحاق ڈار اور وفاقی وزیر اطلاعات عطا تارڑ بھی موجود ہیں۔ شرم الشیخ میں ہونے والا یہ اہم اجلاس عالمی سطح پر امن کے قیام، علاقائی استحکام اور تعاون کے فروغ کے حوالے سے اہم سنگِ میل تصور کیا جا رہا ہے۔
دفتر خارجہ کے مطابق، یہ اجلاس ان سفارتی کوششوں کا تسلسل ہے جو گزشتہ ماہ نیویارک میں اقوامِ متحدہ کی جنرل اسمبلی کے 80ویں اجلاس کے دوران کی گئیں۔ ان کوششوں کے نتیجے میں عالمی رہنماؤں کو ایک مشترکہ پلیٹ فارم پر جمع کیا گیا ہے تاکہ دنیا کو درپیش امن و سلامتی کے چیلنجز کا مؤثر حل تلاش کیا جا سکے۔
یاد رہے کہ 23 ستمبر کو اقوامِ متحدہ کے تحت منعقدہ ایک خصوصی اجلاس میں وزیراعظم شہباز شریف نے عرب و اسلامی ممالک بشمول مصر، اردن، قطر، سعودی عرب، متحدہ عرب امارات، انڈونیشیا اور ترکیہ کے سربراہان کے ساتھ شرکت کی تھی، جہاں عالمی و علاقائی امور پر تبادلہ خیال کیا گیا تھا۔
وزیراعظم کی شرم الشیخ میں ہونے والی ملاقاتیں اور اجلاس میں شرکت، پاکستان کے مؤقف اور سفارتی کردار کو مزید مضبوط بنانے میں اہم کردار ادا کریں گی۔
