افغانستان کی جانب سے 11 اور 12 اکتوبر کی درمیانی شب کی گئی بلااشتعال اور بزدلانہ جارحیت کے خلاف مادرِ وطن کے دفاع دوران شہید ہونے والے پاک فوج کے 12 جوانوں کی نمازِ جنازہ آج چکلالہ گیریژن راولپنڈی میں ادا کردی گئی۔
نمازِ جنازہ میںفیلڈ مارشل سید عاصم منیر، وفاقی وزراء، گورنر خیبرپختونخوا، اعلیٰ سول و عسکری حکام اور عوام کی بڑی تعداد نے شرکت کی۔
اس موقع پر وزیردفاع خواجہ آصف نے کہا کہ پاکستان کے عوام ان عظیم سپاہیوں کی قربانیوں کو کبھی فراموش نہیں کریں گے جنہوں نے وطن کی سالمیت کے دفاع میں اپنی جانیں قربان کیں۔
انہوں نےکہا کہ یہ شہداء افغان طالبان حکومت اور بھارت کی پشت پناہی سے افغانستان کی سرزمین سے چلنے والے دہشت گردوں کی بزدلانہ کارروائیوں کے خلاف ڈٹ کر کھڑے ہوئے۔
وزیر دفاع کا کہنا تھا کہ پاکستان کی مسلح افواج قوم کی مکمل حمایت کے ساتھ ہر قسم کی جارحیت اور سازش کا ڈٹ کر مقابلہ کرنے کے لیے پُرعزم ہیں۔
