پشاور پولیس نے جدید سائنسی اور ٹیکنالوجیکل اختراعات کو بروئے کار لاتے ہوئے ایک ہائی ٹیک ڈرون تیار کیا ہے جو 10 کلومیٹر رینج اور لیزر سسٹم سے لیس ہے۔
سینٹرل پولیس آفس کے مطابق یہ جدید ڈرون نوشہرہ پولیس سینٹر میں کامیابی کے ساتھ ٹیسٹ کیا گیا، اور یہ 10 کلوگرام تک وزن اٹھانے کی صلاحیت رکھتا ہے۔سینٹرل پولیس آفس کا کہنا ہے کہ نئے ڈرون میں نائٹ وژن سرویلنس کیمرے، ٹیئر گیس شیلز اور مارٹر گولے نصب کیے جا سکتے ہیں۔ آٹو انفارمیشن سسٹم سے لیس اس ڈرون کا وزن 55 کلوگرام ہے جبکہ اس کی لمبائی 2 میٹر اور زیادہ سے زیادہ رفتار 36 کلومیٹر فی گھنٹہ ہے۔
سی پی او کے مطابق ڈرون تقریباً ایک گھنٹے تک مسلسل پرواز کر سکتا ہے اور ایک ہزار میٹر کی بلندی تک اپنی کارروائی انجام دینے کی صلاحیت رکھتا ہے، جو سکیورٹی اور نگرانی کے جدید نظام میں نمایاں اضافہ ہے۔
یہ ڈرون پشاور پولیس کی جدید ٹیکنالوجی اور شہری سکیورٹی کے لیے پیش رفت کی عکاسی کرتا ہے، اور مستقبل میں مختلف سیکیورٹی آپریشنز میں استعمال کے لیے تیار ہے۔
