وزیراعظم شہباز شریف 8 نومبر کو ایک روزہ دورے پر آذربائیجان جائیں گے، جہاں وہ یومِ فتح کی قومی تقریبات میں شرکت کریں گے۔
سفارتی ذرائع کے مطابق، وزیراعظم شہباز شریف کو آذربائیجان کی حکومت نے خصوصی طور پر یومِ فتح کی تقریبات میں شرکت کی دعوت دی ہے۔ ان تقریبات میں ترکیہ کے صدر رجب طیب اردوان سمیت خطے کے دیگر رہنما بھی باکو میں موجود ہوں گے۔
ذرائع نے بتایا کہ دورے کے دوران وزیراعظم شہباز شریف کی آذربائیجان کے صدر الہام علییف اور دیگر اعلیٰ قیادت سے ملاقاتیں متوقع ہیں، جبکہ ان کی ترکیہ کے صدر اردوان سے بھی دوطرفہ امور پر گفتگو ہوگی۔
سفارتی ذرائع کے مطابق، آئندہ مہینوں میں صدر الہام علییف کے پاکستان کے دورے کا بھی امکان ہے۔ دونوں رہنماؤں کی آخری ملاقات ستمبر میں چین کے شہر تیانجن میں منعقدہ ایس سی او سربراہ اجلاس کے موقع پر ہوئی تھی۔
واضح رہے کہ آذربائیجان میں یومِ فتح کی تقریبات مقبوضہ نگورنو کاراباخ کی آزادی اور آرمینیا کے خلاف کامیابی کے موقع پر منائی جاتی ہیں، جس میں ماضی میں پاکستان اور ترکیہ نے آذربائیجان کی بھرپور حمایت کی تھی۔
