پشاور: آئی جی خیبرپختونخوا ذوالفقار حمید نے کہا ہے کہ صوبے کی پولیس اس وقت حالت جنگ میں ہے اور کسی بھی دہشت گردانہ کارروائی کی صورت میں بھرپور جوابی کارروائی کی جائے گی۔
ذرائع کے مطابق آئی جی خیبرپختونخوا نے صوبے میں سکیورٹی صورتحال کے پیش نظر تمام آر پی اوز اور ڈی پی اوز کو ہدایات جاری کی ہیں۔
ان میں کہا گیا کہ صوبہ بھر میں حساس مقامات، پولیس تنصیبات، عدالتوں، تعلیمی اداروں، جیلوں، پولیس اسٹیشنوں اور دیگر اہم عمارتوں کا سکیورٹی آڈٹ کیا جائے۔
ہدایت نامے میں مزید کہا گیا کہ مستحکم سکیورٹی میکانزم کے ذریعے ان تنصیبات کے اطراف دگنی سکیورٹی قائم کی جائے تاکہ کسی بھی ناخوشگوار واقعے کی صورت میں پولیس اہلکار شرپسندوں کے مذموم عزائم کو ناکام بنا سکیں۔
صوبے کے تمام داخلی و خارجی راستوں پر چیک پوسٹیں بڑھانے، روزانہ کی بنیاد پر گشت فعال کرنے اور ریجنل و ضلعی سطح پر انٹیلی جنس شیئرنگ کے ایکشن پلان مرتب کرنے کی ہدایات بھی دی گئی ہیں۔
یہ بھی پڑھیں : صدر زرداری اور وزیر اعظم شہباز شریف متفق: امن دشمنوں کے خلاف کارروائیاں بلاوقفہ جاری رہیں گی
صوبے کے تمام انٹیلی جنس اداروں اور سی ٹی ڈی کے ساتھ فوری معلومات کا تبادلہ یقینی بنایا جائے گا۔
آئی جی خیبرپختونخوا نے مزید کہا کہ ریجنل اور ضلعی پولیس افسران پولیس ٹریننگ کالج ہنگو، ایلیٹ پولیس ٹریننگ سنٹر نوشہرہ اور دیگر تربیتی و اسپیشلائزڈ سکولوں کی سکیورٹی انتظامات خود چیک کریں۔
ذوالفقار حمید کا کہنا تھا کہ پولیس کی موجودہ تیاریاں اس بات کو یقینی بنائیں گی کہ کوئی بھی دہشت گردانہ کوشش ناکام ہو اور عوام محفوظ رہیں۔
