چیئرمین پاکستان تحریک انصاف بیرسٹر گوہر نے کہا ہے کہ پی ٹی آئی نے کبھی کسی صوبے پر چڑھائی نہیں کی اور نہ کرے گی ۔
تفصیلات کے مطابق چیئرمین پاکستان تحریک انصاف بیرسٹر گوہر نے کہا ہے کہ ہری پور الیکشن میں ایک بار پھر پارٹی کو مایوس کیا گیا، تاہم اس کے باوجود پی ٹی آئی اپنی جدوجہد ہر حال میں جاری رکھے گی۔ پشاور میںمیڈیا سے گفتگو کرتے ہوئے انہوں نے واضح کیا کہ پی ٹی آئی نے کبھی کسی صوبے پر چڑھائی نہیں کی اور نہ آئندہ کرے گی۔ ان کا کہنا تھا کہ پارٹی کا مؤقف ہمیشہ پُرامن سیاسی جدوجہد رہا ہے۔
بیرسٹر گوہر نے کہا کہ ہری پور کے ضمنی انتخاب میں نتائج نے کارکنوں اور قیادت کو مایوس کیا، لیکن جمہوری جدوجہد سے پیچھے ہٹنے کا سوال ہی پیدا نہیں ہوتا۔ انہوں نے مزید کہا کہ عوام کے مینڈیٹ کے احترام کے لیے جدوجہد ہر فورم پر جاری رکھی جائے گی۔
اس موقع پر وزیراعلیٰ خیبر پختونخوا سہیل آفریدی نے بھی خطاب کیا۔ ان کا کہنا تھا کہ کچھ عناصر ملک میں آئین و قانون کی بالادستی نہیں چاہتے۔ انہوں نے کہا کہ پی ٹی آئی پُرامن رہے گی، لیکن اپنے حق پر کسی کو ڈاکہ نہیں ڈالنے دے گی۔ ان کے مطابق عوامی حقوق کا تحفظ حکومت کی ترجیح ہے۔
دوسری جانب، صوابی میں گفتگو کرتے ہوئے پی ٹی آئی کے سینئر رہنما اسد قیصر نے ہری پور الیکشن میں بدترین دھاندلی کا الزام عائد کیا۔ انہوں نے کہا کہ نتائج کو متنازع بنانے کے لیے منظم طریقے سے مداخلت کی گئی۔ اسد قیصر نے حکومت کی معاشی پالیسیوں کو بھی شدید تنقید کا نشانہ بنایا۔ ان کے مطابق بے روزگاری کی شرح 7.1 فیصد تک پہنچ چکی ہے، جب کہ کوسوں تک کوئی معاشی بہتری دکھائی نہیں دے رہی۔
انہوں نے آئی ایم ایف کے حالیہ بیان کا حوالہ دیتے ہوئے کہا کہ گزشتہ تین برسوں میں 5300 ارب روپے کی کرپشن ہوئی ہے، جو نہایت تشویشناک ہے۔ پی ٹی آئی رہنما نے مطالبہ کیا کہ نیب اس مبینہ کرپشن کی آزادانہ اور شفاف تحقیقات کرے تاکہ حقائق عوام کے سامنے آسکیں۔
پی ٹی آئی قیادت کے مطابق موجودہ حالات میں عوامی حقوق، آئین کی بالادستی اور شفاف الیکشن ان کی جدوجہد کا بنیادی محور ہے، اور اس راستے میں کوئی رکاوٹ انہیں پیچھے نہیں ہٹا سکتی۔
