پشاور: بالائی علاقوں میں موسم کی شدت بڑھنے کے ساتھ ساتھ خیبرپختونخوا اور کشمیر کے مختلف حصوں میں شدید بارش اور برفباری کا سلسلہ شروع ہوگیا ہے، جس کے نتیجے میں سردی کی شدت میں بھی نمایاں اضافہ دیکھنے کو مل رہا ہے۔
پشاور، ہنگو اور چارسدہ میں تیز بارش کے بعد سردی کی شدت میں اضافہ ہوگیا ہے، جبکہ چترال، کالام، مہوڈنڈ اور مالم جبہ میں برفباری کے بعد علاقے سفید چادر سے ڈھک گئے ہیں۔ ان علاقوں میں قدرتی مناظر انتہائی دلکش اور خوبصورت بن گئے ہیں۔
زیریں وادی نیلم میں بھی بارشوں کا سلسلہ جاری ہے اور بالائی علاقوں میں وقفے وقفے سے برفباری ہو رہی ہے، جس سے سردی کی شدت میں مزید اضافہ ہو چکا ہے۔
محکمہ موسمیات کے مطابق آئندہ دنوں میں اس موسم کا سلسلہ جاری رہنے کا امکان ہے۔
بلوچستان میں بھی طویل انتظار کے بعد بارشوں کا آغاز ہو چکا ہے، جس کے نتیجے میں صوبے بھر میں سردی کی شدت میں اضافہ ریکارڈ کیا گیا ہے۔
یہ بھی پڑھیں : جڑواں شہروں میں تیز اور کبھی ہلکی بارش، سردی کی شدت میں اضافہ
چمن شہر، قلعہ عبداللہ اور توبہ اچکزئی میں تیز ہوا کے ساتھ بارش ہوئی، جس سے کئی علاقوں میں بجلی کے کھمبے گرنے، دیواروں کے گرنے اور درختوں کے اکھڑنے جیسے مسائل پیدا ہوئے ہیں۔
محکمہ موسمیات نے مزید بارشوں اور برفباری کی پیش گوئی کی ہے اور سیاحوں کو محتاط رہنے کی ہدایت کی گئی ہے۔
شہریوں اور سیاحوں کو غیر ضروری سفر سے گریز کرنے کی درخواست کی گئی ہے تاکہ موسمی حالات سے بچا جا سکے۔
