انٹرنیشنل کرکٹ کونسل (آئی سی سی) کے ٹی20 ورلڈ کپ 2026ء میں کرکٹ کا سب سے بڑا مقابلہ روایتی حریفوں پاکستان اور بھارت کے درمیان آج کولمبو کے پریما داسا اسٹیڈیم میں کھیلا جائے گا۔ میچ پاکستانی وقت کے مطابق شام 6:30 بجے شروع ہوگا۔
ذرائع کے مطابق، پاکستان ٹیم کی مینجمنٹ 11 کھلاڑیوں کا حتمی فیصلہ میچ سے بالکل پہلے کرے گی۔ اطلاعات کے مطابق فخر زمان کو میچ میں نہ کھلانے کا فیصلہ کر لیا گیا ہے، جبکہ خواجہ نافع اور سلمان مرزا کے متعلق حتمی فیصلہ پِچ دیکھ کر کیا جائے گا۔ اگر سلمان مرزا کو ٹیم میں شامل کیا گیا تو فہیم اشرف ڈراپ ہوں گے۔
فاسٹ بولر شاہین آفریدی کی حتمی ٹیم میں شمولیت یقینی ہے، اور ذرائع کے مطابق بھارت کے بیٹر ابھیشک شرما کے خلاف اسپنر عثمان طارق سے نئی گیند کرانے کی منصوبہ بندی کی گئی ہے۔
کرکٹ حلقوں کا کہنا ہے کہ پاکستان اور بھارت کے اس ہائی وولٹیج مقابلے کے بارش سے متاثر ہونے کے امکانات اب کم ہو گئے ہیں۔ کولمبو میں بارش کے مختلف اوقات میں امکان تھا، لیکن آج کے لیے پیش گوئی کے مطابق بارش کے خدشات بتدریج کم ہو رہے ہیں۔
یہ میچ نہ صرف دونوں ٹیموں کے لیے بلکہ عالمی کرکٹ کے شائقین کے لیے بھی بے حد اہمیت رکھتا ہے، اور شائقین کی نظریں اب کولمبو کے میدان پر جمی ہوئی ہیں۔
