پشاور: خیبر پختونخوا کے ضلع شمالی وزیرستان کی تحصیل شیواہ سے تعلق رکھنے والی کم عمر بچی آئینہ وزیر کی شاندار بولنگ نے سوشل میڈیا پر دھوم مچا دی۔
بچوں کے ایک مقامی کرکٹ میچ میں ان کی تیز رفتار اور پراعتماد بولنگ کی ویڈیو وائرل ہوئی تو صارفین نے نہ صرف اسے خوب سراہا بلکہ ان کے روشن مستقبل کے لیے نیک تمناؤں کا اظہار بھی کیا۔
وائرل ویڈیو میں آئینہ وزیر کو فاسٹ بولنگ کرتے دیکھا جا سکتا ہے، جہاں وہ بھرپور ایکشن اور مہارت کے ساتھ گیند کراتی نظر آتی ہیں۔ سوشل میڈیا پر متعدد صارفین نے ماشاءاللہ اور حوصلہ افزا پیغامات کے ذریعے اس ننھی کھلاڑی کی صلاحیتوں کو سراہا۔
واو: ماشاءاللہ اس بچی کی باولنگ چیک کرے۔
آئینہ وزیر کا تعلق تحصیل شیواہ شگہ زالول خیل سے ہے اور شہید #عمرگل کی بیٹی ہے ، یہ بچوں کا ایک ٹورنامنٹ ہے جس میں آئینہ کی اپنی ٹیم ہے، افسوس مواقع نہیں ہے ورنہ ہمارے بچوں میں بہت ٹیلنٹ ہے، pic.twitter.com/cPzVBJ9ulk
— Badshah Pashteen (@badshahpashten) February 18, 2026
مقامی شائقین اور کھیلوں سے وابستہ افراد کا کہنا ہے کہ قبائلی اضلاع میں ٹیلنٹ کی کمی نہیں، مگر مناسب سہولیات اور پلیٹ فارم نہ ہونے کے باعث اکثر باصلاحیت بچے منظرعام پر نہیں آ پاتے۔
آئینہ وزیر کی ویڈیو نے اس تاثر کو تقویت دی ہے کہ اگر مواقع فراہم کیے جائیں تو یہ بچے قومی اور بین الاقوامی سطح پر نام روشن کر سکتے ہیں۔
ویڈیو وائرل ہونے کے بعد پاکستان سپر لیگ کی معروف فرنچائز پشاور زلمی کے مالک جاوید آفریدی بھی آئینہ کی صلاحیتوں سے متاثر ہوئے۔
انہوں نے سوشل میڈیا پر تبصرہ کرتے ہوئے آئینہ وزیر کو غیرمعمولی ٹیلنٹ قرار دیا اور کہا کہ ایسا ہنر یقیناً بہتر پلیٹ فارم کا مستحق ہے۔
MashAllah, what an outstanding young talent Aina Wazir is!
Talent like this deserves a right platform.
This is why I am pleased to share that she will be part of our upcoming Zalmi Women League @ZWLofficial. A platform we’ve created for our girls to play, inspire and express…— Javed Afridi (@JAfridi10) February 18, 2026
جاوید آفریدی نے اعلان کیا کہ آئینہ وزیر کو آنے والی زلمی ویمن لیگ میں شامل کیا جائے گا، جو لڑکیوں کو کھیل کے میدان میں آگے بڑھنے کا موقع فراہم کرنے کے لیے ترتیب دی گئی ہے۔
یہ بھی پڑھیں : خیبر پختونخوا میں مزید 9 مہاجر کیمپس خالی کرانے کا فیصلہ
ان کا کہنا تھا کہ اس پلیٹ فارم کا مقصد باصلاحیت بچیوں کو آگے لانا، انہیں اعتماد دینا اور ان کی صلاحیتوں کو نکھارنے کے مواقع فراہم کرنا ہے۔
انہوں نے یہ بھی یقین دہانی کرائی کہ آئینہ وزیر کو ضروری کرکٹ سامان اور سہولیات فراہم کی جائیں گی تاکہ وہ بہتر تربیت حاصل کر سکیں اور اپنی صلاحیتوں کو مزید نکھار سکیں۔
یہ بھی پڑھیں : میٹرک اور انٹرمیڈیٹ امتحانات :خیبرپختونخوا حکومت نے بڑا فیصلہ کرلیا
ساتھ ہی سوشل میڈیا صارفین سے درخواست کی گئی کہ آئینہ وزیر کی تفصیلات شیئر کی جائیں تاکہ ٹیم براہِ راست ان سے رابطہ کر سکے۔
آئینہ وزیر کی کہانی اس بات کی مثال بن گئی ہے کہ سوشل میڈیا کس طرح پوشیدہ ٹیلنٹ کو سامنے لا کر نئی راہیں کھول سکتا ہے۔
