پشاور سے جاری بیان میں گورنر خیبر پختونخوا فیصل کریم کنڈی نے کہا ہے کہ دہشت گردوں کی جہاں بھی اطلاع ملی، فوراً کارروائی کی جائے گی۔ اُنہوں نے زور دیا کہ پاکستان کی سلامتی سب سے زیادہ عزیز ہے اور سیکیورٹی ادارے کسی بھی خطرے کا بروقت جواب دیں گے۔
فیصل کریم کنڈی نے کہا کہ عید کی چھٹیاں ختم ہو چکی ہیں اور اب سب کو دیکھنا ہے کہ وفاقی اور صوبائی حکومتیں کفایت شعاری پر کتنا عمل کرتی ہیں۔ انہوں نے عوام اور میڈیا سے اپیل کی کہ وہ اس معاملے میں آگاہ رہیں اور سیکیورٹی کے ساتھ پروٹوکول کو الگ رکھا جائے۔
گورنر نے مزید کہا کہ پاکستان نے اپنے برادر ممالک ترکی اور سعودی عرب کی درخواست پر عارضی جنگ بندی کی تھی، لیکن افغانستان کی سرزمین کا استعمال پاکستان کے خلاف کیا جا رہا ہے، جس سے دوحہ معاہدے کی خلاف ورزی ہو رہی ہے۔
انہوں نے واضح کیا کہ دہشت گردوں کی موجودگی کی اطلاع ملتے ہی فوری کارروائی ہوگی، اور ملکی سلامتی اور عوام کا تحفظ ہر معاملے میں اولین ترجیح ہے۔
