خیبرپختونخوا حکومت نے کفایت شعاری مہم کے تحت مختلف محکموں کے اربوں روپے کے فنڈز عارضی طور پر روکنے کا فیصلہ کر لیا ہے
ذرائع کے مطابق حکومت نے سالانہ ترقیاتی منصوبوں اور جاری اخراجات کے لیے مختص 25 ارب روپے سے زائد فنڈز روک دیے ہیں۔ تاہم محکمہ صحت، بی آر ٹی، ریسکیو سروسز اور پولیس کو اس فیصلے سے مستثنیٰ قرار دیا گیا ہے۔
حکام کا کہنا ہے کہ اس اقدام کا مقصد صوبائی خزانے پر کسی بھی ممکنہ ہنگامی صورتحال کے دوران دباؤ کو کم رکھنا ہے، تاکہ مالی استحکام برقرار رکھا جا سکے۔
دوسری جانب وفاقی حکومت کی جانب سے واجبات کی بروقت ادائیگی نہ ہونے کے باعث صوبے کو مالی مشکلات کا سامنا بھی ہو سکتا ہے۔ ذرائع کے مطابق گزشتہ ماہ کے لیے مختص 61 ارب روپے میں سے صرف 17 ارب روپے ہی جاری کیے گئے، جبکہ تقریباً 40 ارب روپے کی کمی سے مالی دباؤ بڑھنے کا خدشہ ہے۔
ذرائع کا مزید کہنا ہے کہ ترقیاتی اور جاری بجٹ کو عارضی طور پر روکنے کے باوجود محکموں کی کارکردگی متاثر نہیں ہوگی، اور یہ اقدام صرف مالی نظم و ضبط کو بہتر بنانے کے لیے اٹھایا گیا ہے۔
