پاکستان کے نائب وزیراعظم اور وزیر خارجہ سینیٹر محمد اسحاق ڈار نے سعودی عرب کے وزیر خارجہ شہزادہ فیصل بن فرحان سے ٹیلیفون پر رابطہ کیا ہے۔
ترجمان دفتر خارجہ کی جانب سے جاری بیان کے مطابق دونوں رہنماؤں کے درمیان ہونے والی اس گفتگو میں خطے کی بدلتی صورتحال پر تفصیلی تبادلہ خیال کیا گیا۔
ٹیلیفونک رابطے کے دوران دونوں وزرائے خارجہ نے خطے میں کشیدگی کم کرنے کی فوری ضرورت پر زور دیا اور مسائل کے حل کے لیے مذاکرات کی اہمیت کو اجاگر کیا۔
اس موقع پر خلیج اور مشرق وسطیٰ میں امن کے قیام کے لیے پاک چین پانچ نکاتی اقدام پر بھی خصوصی مشاورت کی گئی۔
دونوں رہنماؤں نے پاکستان اور سعودی عرب کے درمیان گہرے برادرانہ تعلقات کی مضبوطی کا اعادہ کیا اور مستقبل میں بھی باہمی دلچسپی کے امور پر قریبی رابطے میں رہنے پر اتفاق کیا۔
