پاکستان تحریک انصاف (پی ٹی آئی) کے رکن قومی اسمبلی جنید اکبر خان نے پیٹرول کی قیمتوں میں حالیہ اضافے پر حکومت سے وضاحت طلب کر لی۔ قومی اسمبلی کے اجلاس میں اظہارِ خیال کرتے ہوئے انہوں نے مطالبہ کیا کہ عوام کو بتایا جائے کہ پیٹرول کی قیمت کس بنیاد پر اور کس طریقہ کار کے تحت بڑھائی گئی۔
جنید اکبر خان کا کہنا تھا کہ موجودہ حکومت عوام کے ووٹوں سے برسرِ اقتدار نہیں آئی، جبکہ مشکل معاشی حالات کا سامنا صرف پاکستان ہی نہیں بلکہ پوری دنیا کر رہی ہے۔ انہوں نے خبردار کیا کہ پیٹرول کی قیمتوں میں اضافہ محض ابتدا ہے اور آنے والے دنوں میں مہنگائی میں مزید اضافہ متوقع ہے۔
انہوں نے حکومت کو تنقید کا نشانہ بناتے ہوئے کہا کہ بدقسمتی سے حکومتی ارکان سنجیدہ مسائل کے حل کے بجائے ایک دوسرے کی تعریفوں میں مصروف ہیں۔ ان کا مزید کہنا تھا کہ بعض سیاستدان صرف ذاتی مفادات اور مالی فائدے کے لیے سیاست میں آئے ہیں۔
اپوزیشن کی جانب سے پیٹرولیم مصنوعات کی قیمتوں میں اضافے پر مسلسل آواز اٹھائی جا رہی ہے، جبکہ عوام بھی بڑھتی ہوئی مہنگائی پر شدید تشویش کا اظہار کر رہے ہیں۔
