ڈیڈ لائن کے خاتمے کے بعد کوہاٹ سے افغان مہاجرین کی وطن واپسی کا عمل جاری ہے، جہاں مختلف افغان مہاجر کیمپوں سے اب تک 12 ہزار 208 خاندانوں کو واپس بھیجا جا چکا ہے۔
ذرائع کے مطابق کوہاٹ کے مختلف مہاجر کیمپوں میں مقیم افغان خاندانوں کی واپسی کا مرحلہ بتدریج مکمل کیا جا رہا ہے۔ وطن واپسی کے لیے انتظامات کے تحت خاندانوں کی رجسٹریشن، دستاویزات کی جانچ پڑتال اور دیگر ضروری کارروائیاں مکمل کرنے کے بعد انہیں واپس روانہ کیا جا رہا ہے۔
حکام کے مطابق افغان مہاجرین کی واپسی کا عمل مقررہ طریقہ کار کے تحت جاری ہے، جبکہ متعلقہ ادارے اس پورے عمل کی نگرانی کر رہے ہیں تاکہ واپس جانے والے خاندانوں کو ضروری سہولیات فراہم کی جا سکیں۔
کوہاٹ کے مختلف علاقوں میں قائم افغان مہاجر کیمپوں سے بڑی تعداد میں خاندان اپنے وطن روانہ ہو چکے ہیں، جبکہ مزید خاندانوں کی واپسی کا سلسلہ بھی جاری ہے۔
واضح رہے کہ مقررہ ڈیڈ لائن ختم ہونے کے بعد افغان مہاجرین کی وطن واپسی کے عمل میں تیزی آئی ہے، جس کے تحت مختلف اضلاع سے افغان شہریوں کی واپسی جاری ہے۔
