اسلام آباد: پاکستان کی آٹو مارکیٹ میں چنگان نے اپنی نئی پک اپ نیوو ہنٹر REEV باضابطہ طور پر متعارف کرا دی ہے، جس میں الیکٹرک ڈرائیو، رینج ایکسٹینڈر ٹیکنالوجی اور آل وہیل ڈرائیو سمیت متعدد جدید فیچرز شامل کیے گئے ہیں۔
کمپنی کے مطابق نیوو ہنٹر REEV فیول اور بیٹری کے امتزاج سے 900 کلومیٹر سے زائد مجموعی ڈرائیونگ رینج فراہم کرنے کی صلاحیت رکھتی ہے، جس کے باعث یہ طویل سفر اور آف روڈ ڈرائیونگ کے شوقین افراد کے لیے ایک اہم آپشن بن سکتی ہے۔
پاکستان میں متعارف کرائے گئے ماڈل میں 2.0 لیٹر ٹربو انجن اور آل وہیل ڈرائیو سسٹم دیا گیا ہے۔ گاڑی کا پاور سسٹم 322 ہارس پاور اور 529 نیوٹن میٹر ٹارک پیدا کرتا ہے۔
گاڑی میں 31.18 کلو واٹ آور کی بیٹری نصب ہے، جو NEDC معیار کے مطابق 131 کلومیٹر تک خالص الیکٹرک ڈرائیونگ فراہم کرتی ہے۔ اس کے علاوہ 70 لیٹر کا فیول ٹینک بھی موجود ہے، جبکہ بیٹری کی توانائی کم ہونے پر رینج ایکسٹینڈر سسٹم سفر جاری رکھنے میں مدد فراہم کرتا ہے۔
مختلف ڈرائیونگ اور آف روڈ موڈز
نیوو ہنٹر REEV میں ایکو، کمفرٹ، اسپورٹ، ٹریکشن اور کسٹم ڈرائیونگ موڈز شامل کیے گئے ہیں۔ آف روڈ ڈرائیونگ کے لیے اسنو، مڈ، سینڈ، کرول، ٹوئنگ اور آف روڈ موڈز بھی فراہم کیے گئے ہیں۔
گاڑی کی لمبائی 5,380 ملی میٹر، چوڑائی 1,980 ملی میٹر، اونچائی 1,920 ملی میٹر جبکہ وہیل بیس 3,180 ملی میٹر ہے۔
جدید سہولیات اور سیفٹی فیچرز
اندرونی حصے میں 12.3 انچ انفوٹینمنٹ ڈسپلے، 6 اسپیکرز پر مشتمل آڈیو سسٹم اور 50 واٹ وائرلیس چارجنگ کی سہولت دی گئی ہے۔
سیفٹی کے لیے گاڑی میں 6 ایئر بیگز، اینٹی لاک بریکنگ سسٹم، الیکٹرانک بریک فورس ڈسٹری بیوشن، ٹریکشن کنٹرول، پارکنگ سینسرز اور ٹائر پریشر مانیٹرنگ سسٹم شامل ہیں۔
قیمت اور بکنگ
چنگان نیوو ہنٹر REEV کی پاکستان میں ابتدائی قیمت 1 کروڑ 9 لاکھ 90 ہزار روپے مقرر کی گئی ہے، جبکہ بکنگ کے لیے 22 لاکھ روپے ادا کرنا ہوں گے۔
کمپنی کے مطابق یہ ابتدائی قیمت مخصوص شرائط و ضوابط کے تحت ہے، اس لیے صارفین کو بکنگ سے قبل متعلقہ ڈیلر سے قیمت، ڈیلیوری اور دیگر شرائط کی تصدیق کرنے کی ہدایت کی گئی ہے۔
الیکٹرک اور ہائبرڈ گاڑیوں کے بڑھتے رجحان کے درمیان نیوو ہنٹر REEV پاکستان کی پک اپ مارکیٹ میں جدید ٹیکنالوجی، طویل رینج اور آف روڈ صلاحیتوں کے امتزاج کے ساتھ ایک نیا آپشن بن کر سامنے آئی ہے۔
