قومی فضائی کمپنی پاکستان انٹرنیشنل ائیر لائنز (پی آئی اے) نے نجکاری کے عمل کے بعد اپنے برانڈ کو جدید اور دلکش بنانے کی جانب ایک اور تاریخی قدم اٹھاتے ہوئے کیبن کریو کے یونیفارم میں مکمل تبدیلی کا اعلان کر دیا ہے۔
پی آئی اے انتظامیہ کی جانب سے اس نئے اور شاندار یونیفارم کی باقاعدہ رونمائی لاہور میں ایک پروقار تقریب کے دوران کی گئی ہے، جسے ملک بھر میں بھرپور پذیرائی مل رہی ہے۔
یہ جدید اور دلکش یونیفارم پاکستان کے صفِ اول کے معروف فیشن ڈیزائنر حسن شہریار یاسین (ایچ ایس وائی) نے ڈیزائن کیا ہے، جو روایتی خوبصورتی اور جدید فیشن کا ایک حسین امتزاج ہے۔
انتظامیہ کے مطابق یہ نیا لک رواں ماہ 31 اکتوبر 2026 سے باقاعدہ طور پر ائیرلائن کی فضائی سروس کا حصہ بن جائے گا۔
اس نئے یونیفارم کو سب سے پہلے اسلام آباد اور لندن کے درمیان پی آئی اے کی نئی بوئنگ ڈریم لائنر سروس کی افتتاحی پرواز پر مامور عملے کو پہنایا جائے گا، جو قومی ائیرلائن کے بدلے ہوئے اور باوقار امیج کی عکاسی کرے گا۔
پی آئی اے کی برانڈڈ تبدیلی کے اس سفر میں سخت مسابقت دیکھنے میں آئی۔گزشتہ ستمبر 2026 میں کراچی کے اندر ایک شاندار ڈیزائن شوکیس کا انعقاد کیا گیا تھا، جس میں پاکستان کے 10 بڑے اور نامور فیشن ڈیزائنرز (جن میں نومی انصاری، عامر عدنان اور معروف برانڈ جنریشن بھی شامل تھے) نے اپنے تخلیقی آئیڈیاز اور ڈیزائنز پیش کیے تھے۔
تاہم ایک سخت اور ماہرانہ جیوری نے طویل پروازوں کے دوران کیبن کریو کے لیے آرام دہ ہونے، کپڑے کی پائیداری، اور پاکستانی ثقافت و جدیدیت کے بہترین امتزاج کی بنیاد پر حتمی طور پر ایچ ایس وائی کے ڈیزائن کردہ یونیفارم کا انتخاب کیا۔
یہ بھی پڑھیں : K2 ایئرویز کارگو طیارہ حادثہ، پی آئی اے کا اظہارِ افسوس، ریسکیو آپریشن میں تعاون کی پیشکش
ایوی ایشن و معاشی ماہرین کا کہنا ہے کہ پی آئی اے کی نجکاری کے بعد ائیرلائن کے مجموعی امیج، مسافروں کو بہتر سہولیات کی فراہمی اور برانڈ کو عالمی معیار کے مطابق ڈھالنے کی یہ کوششیں قومی ائیرلائن کے سنہرے دور کی واپسی کا منہ بولتا ثبوت ہیں۔
