گورنر خیبرپختونخوا فیصل کریم کنڈی نے سینیٹ انتخابات کے تناظر میں ہارس ٹریڈنگ کے خدشات پر تشویش کا اظہار کرتے ہوئے کہا ہے کہ ایسی غیر جمہوری روش کا خاتمہ حکومت کی ذمہ داری ہے۔
پشاور میں میڈیا سے گفتگو کرتے ہوئے فیصل کریم کنڈی کا کہنا تھا کہ الیکشن کمیشن کی جانب سے خیبرپختونخوا اسمبلی کا اجلاس بلانے سے متعلق خط موصول ہو چکا ہے، اور آج ہی گورنر آفس اس خط کو پراسیس کرے گا۔
قومی اخبار (روزنامہ جنگ ویب سائٹ)کے مطابق فیصل کریم کنڈی نے کہا کہ صوبائی حکومت 5 سینیٹ نشستیں اپوزیشن کے لیے مختص کرے اور 6 نشستیں خود رکھے۔ ان کے مطابق اسمبلی میں اس وقت 35 آزاد ارکان موجود ہیں، جن پر کسی سیاسی جماعت کا دباؤ نہیں ہے۔
گورنر خیبرپختونخوا نے کہا کہ اگر حکومت توازن قائم نہیں کرتی تو اپوزیشن چھٹی نشست پر بھی بھرپور مقابلہ کرے گی۔ انہوں نے کہا کہ ان کی ملاقات مولانا فضل الرحمان اور امیر مقام سے ہو چکی ہے، اور دونوں نے یقین دلایا ہے کہ اپوزیشن جماعتیں سینیٹ الیکشن متحد ہو کر لڑیں گی۔
فیصل کریم کنڈی نے زور دیا کہ آزاد حیثیت میں منتخب ارکان پر کسی قسم کا دباؤ نہیں ہونا چاہیے اور انہیں اپنے ضمیر اور سیاسی بصیرت کے مطابق فیصلہ کرنے کا حق حاصل ہے۔
