واشنگٹن: امریکی محکمہ خارجہ نے شام کی جنوبی سرحدوں سے غیر ملکی افواج کے فوری انخلا کا مطالبہ کرتے ہوئے کہا ہے کہ علاقائی کشیدگی میں کمی لانے کے لیے فوری اور مؤثر اقدامات ناگزیر ہیں۔
محکمہ خارجہ کے ترجمان کی جانب سے جاری بیان میں کہا گیا ہے کہ امریکا چاہتا ہے کہ شام کے ان علاقوں، خصوصاً اردن سے متصل سرحدی پٹی، سے غیر ملکی افواج کو ہٹایا جائے تاکہ خطے میں امن و استحکام قائم ہو سکے۔ بیان میں خطے میں مختلف طاقتوں کی عسکری موجودگی کو شام اور اس کے ہمسایہ ممالک کے لیے خطرہ قرار دیا گیا ہے۔
امریکی حکام نے خاص طور پر ایران کی حمایت یافتہ ملیشیاؤں کی سرگرمیوں پر شدید تحفظات کا اظہار کرتے ہوئے انہیں علاقائی عدم استحکام کا سبب قرار دیا ہے۔ بیان میں مزید کہا گیا ہے کہ شام میں بیرونی مداخلت نے انسانی بحران کو مزید گمبھیر بنا دیا ہے، جس کے تدارک کے لیے تمام فریقین کو سنجیدگی سے مذاکرات کا راستہ اپنانا ہوگا۔
یہ بھی پڑھیں : خیبر پختونخوا سینیٹ انتخابات: حکومت اور اپوزیشن میں 6/5 فارمولے پر اصولی اتفاق
امریکا نے زور دیا کہ سیاسی حل ہی شام کے دیرپا امن کا واحد راستہ ہے، اور تمام متاثرہ فریقین کو چاہیے کہ وہ کشیدگی بڑھانے کے بجائے تعمیری مکالمے اور بین الاقوامی قوانین کا احترام کریں۔
